"Бәләкәй һәм урта эшҡыуарлыҡ, шәхси эшҡыуарлыҡ башланғыстарына ярҙам" милли проектының билдәләнгән күрһәткестәренә өлгәшеү маҡсатында Нуриман районы хакимиәтендә аҙна һайын эшҡыуарлыҡ сәғәттәре үткәрелә. Сираттағы “Эшҡыуарлыҡ сәғәте”ндә туризм өлкәһендәге ҡыҙыҡлы проект – Красный Ключ ауылында модулле конструкциялар нигеҙендә ял базаһы төҙөлөшө ҡаралды. Проекттың төп үҙенсәлеге – заманса минималистик стиль, СПА-комплекс һәм төҙөкләндерелгән пляж. Инвестор тейешле рөхсәт ителгән файҙаланыу төрө менән ер участкаларын милеккә һатып алған һәм проект эштәрен башлаған. 100 миллион һумдан ашыу инвестиция һалыу һәм яңы эш урындары булдырыу күҙ уңында тотола. Яр буйы линияһын һәм пляжды төҙөкләндереү мәсьәләләрен хәл итеү өсөн проект әҙерләү һәм Башҡортостан Республикаһы Башлығы ҡарамағындағы “Инвестиция сәғәте” кәңәшмәһендә күрһәтеү күҙаллана. Район хакимиәте инвесторға һәр яҡлап ярҙам күрһәтәсәк, сөнки проектты тормошҡа ашырыу Нуриман районына тағы ла күберәк туристарҙы йәлеп итергә мөмкинлек бирәсәк. “Эшҡыуарлыҡ сәғәте”ндә ҡатнашыуға заявканы Нуриман районы хакимиәтенең иҡтисад бүлегендә ҡалдырырға мөмкин. Бәйләнеш өсөн телефон: 8(34776) 22357 - Әхиәрова Венера Тәлғәт ҡыҙы, Нуриман районының инвестиция вәкиле. Билдәле булыуынса, “Бәләкәй һәм урта эшҡыуарлыҡ, шәхси эшҡыуарлыҡ башланғыстарына ярҙам” (национальный проект “Малое и среднее предпринимательство и поддержка индивидуальной предпринимательской инициативы”) милли проекты Рәсәй Президенты Владимир Путиндың май указы менән булдырылды. Фото: Нуриман районы хакимиәте.