4 майҙа Республика йортонда Башҡортостан Башлығы Радий Хәбиров сираттағы «Инвестиция сәғәте»н үткәрҙе. Унда сәнәғәттә, ауыл хужалығында һәм хеҙмәтләндереү өлкәһендә яңы проекттар тикшерелде. «Бәхетле» крәҫтиән хужалығы директоры Роберт Ғәрәфетдинов Туймазы районында йәшелсә үҫтереү буйынса теплица комбинаты төҙөү проектын тәҡдим итте. Был йүнәлеште эшҡыуар 2008 йылдан ғаилә бизнесы форматында үҫтерә. Уҙған йыл йомғаҡтары буйынса хужалыҡта 2,2 мең тонна йәшелсә үҫтерелде, уларҙы Башҡортостанда, Пермь крайында һәм Свердловск өлкәһендә һатҡандар. Хәҙерге теплица комплексы 5 гектар майҙанды биләй. Инвестиция проекты сиктәрендә газ йылылыҡ генераторҙары менән 2 гектар майҙанда өҫтәмә парниктар ҡуйыу планлаштырыла. Бынан тыш, майҙансыҡта ике һыуытҡыс һәм эшкәртеү цехы булған йәшелсә һаҡлағысы төҙөләсәк. Инвестицияларҙың дөйөм суммаһы – 260 миллион һум. Был үҫтерелгән йәшелсә күләмен йылына 3 мең тоннаға тиклем арттырырға мөмкинлек бирәсәк. Инвесторға ярҙам саралары сифатында ауыл хужалығы техникаһы һәм ҡорамалдар һатып алыуға сығымдарҙың бер өлөшөн ҡаплайҙар. Башҡортостан Башлығы ауыл хужалығы эшкәртеүселәренә артабанғы үҫеште планлаштырырға тәҡдим итте, республика ғаилә бизнесына ярҙам итергә әҙер булыуын билдәләне. *** Өфөнөң «Ювента» компанияһы директоры Руслан Ҡалҡаманов ишек өсөн фурнитура етештереүҙе киңәйтеү буйынса ниәттәре хаҡында һөйләне. 2020 йылдан алып ғәмәлдәге майҙансыҡтарҙың етештереү ҡеүәте йылына 500 мең деталгә тиклем арттырыла. Рәсәй төбәктәренән 200-ҙән ашыу партнерға тотҡалар һәм метиздар импортты алмаштырыу сиктәрендә килтерелә. Яңы проект 1,5 мең квадрат метр майҙанлы административ-производство корпусы төҙөләсәк ер участкаһын ҡуртымға алыуҙы күҙ уңында тота. Был 25 яңы эш урыны булдырырға, продукция етештереү күләмен ике тапҡырға арттырырға мөмкинлек бирәсәк. Инвестициялар суммаһы -105 миллион һум. Фекер алышыу йомғаҡтары буйынса проект һалым льготалары менән өҫтөнлөклө статус ала. Бынан тыш, Өфө хакимиәте ер участкаһын рәсмиләштереүҙә, ә Башҡортостан сәнәғәтен үҫтереү фонды льготалы займ бүлеүҙә булышлыҡ итәсәк. *** Артабан республиканың Инвестиция комитеты Өфөлә Ағиҙел йылғаһы буйында спорт-рекреацион объекттар һәм йәмәғәт туҡланыуы учреждениелары төҙөү концепцияларын ҡараны. Мәҫәлән, «Альянс» компанияһы ресторан һәм һауыҡтырыу термаль комплекстары проекттарын тәҡдим итте, ә ҙур банктарҙың береһе Урам баскетболы үҙәген төҙөүҙе финансларға әҙер. Башҡортостан Башлығы был проекттарҙы тикшереү өсөн күсмә кәңәшмә ойошторорға ҡушты. - Ағиҙел йылғаһы яры ҡала өсөн ҙур әһәмиәткә эйә. Урындағы концепцияларҙы эшкәртеү мөһим. Бының өсөн архитекторҙарҙы һәм башҡа белгестәрҙе саҡырырға әҙербеҙ, – тип билдәләне Радий Хәбиров. - Бындай объекттар эстетик һәм техник яҡтан тикшерелергә тейеш. *** Бынан тыш, “Инвестиция сәғәте"ндә туризм һәм юл буйы сервисы өлкәһендәге өс проект хупланды, инвестицияларҙың дөйөм күләме яҡынса 70 миллион һум тәшкил итте. Улар Архангел һәм Белорет райондарында күп функциялы комплекстар, шулай уҡ Ҡариҙел районында “Ҡурай яры” глэмпинг-базаһы төҙөүҙе күҙ уңында тота. Инвесторҙарға ярҙам саралары сифатында ер участкаларын рәсмиләштереүҙә һәм инженер селтәрҙәрен үткәреүҙә ярҙам күрһәтеләсәк. Сығанаҡ: glavarb.ru