Ҡыҙылса - киҫкен инфекция ауырыуы. Һауа, һулыш алыу ағзалары аша йоға. Инфекция сығанағы - сирле кеше. Өлкәндәрҙә ҡыҙылсаның өс клиник сағылышы күҙәтелә. Беренсе осор, йәки катараль осор, дөйөм ауырыуҙан, температураның 40 градусҡаса күтәрелеүенән, баш ауыртыуынан, тымауҙан һәм ҡоро йүткереүҙән башлана. Һуңыраҡ яҡтылыҡҡа һиҙгерлек, конъюнктивит, биттең лайлалы тиресәһендә аҡ таптар барлыҡҡа килә. Икенсеһе – сәбертмә сығыу осоро. Тәнгә таптар сыға, уларҙың бергә ҡушылыуы ихтимал. Башта улар ҡолаҡ артында һәм баштың түбә өлөшөндә, артабан биттә, муйында һәм күкрәктә барлыҡҡа килә. Яйлап өҫтән аҫҡа ҡарай бөтә кәүҙәне ҡаплап ала. сир сәбертмә барлыҡҡа килгәнгә тиклем 3-4 көн алда һәм сәбертмәнең тәүге 4 көнөндә йоғошло. 3-4 көндән һуң өсөнсө осор - пигментация осоро башлана. Был осорҙа дөйөм хәлдең яйлап яҡшырыуы күҙәтелә. Ҡыҙылсаның пневмония, энцефалит, менингит, менингоэнцефалит, полиневрит, отит ауырыуҙарына килтереүе бар. Баш мейеһе шешеүенә килтергән энцефалит 1000 осраҡҡа берәү тура килә. Ҡыҙылсаны иҫкәртеүҙең иң һөҙөмтәле сараһы - вакцинация. Бөтә донъя һаулыҡ һаҡлау ойошмаһы иҫкәртә: COVID-19 пандемияһы ҡыҙылса сире барлыҡҡа килеү хәүефе тыуҙыра. 2020 йылда пандемия арҡаһында 22 миллиондан ашыу сабый ҡыҙылсаға ҡаршы вакцинаның беренсе дозаһын үткәрмәй. Был 2019 йылға ҡарағанда 3 миллионға күберәк. Вакцинация милли профилактик прививкалар календарына ярашлы план тәртибендә үткәрелә, ул препараттар индереү ваҡытын регламентлай һәм 35 йәшкә тиклемге бөтә халыҡты һәм 36 йәштән 55 йәшкә тиклемге өлкәндәрҙе айырым хәүеф төркөмдәренән (элек прививкаланмаған һәм ҡыҙылса менән ауырымаған) планлы вакцинациялауҙы күҙ уңында тота. Балаларға прививка 1 йәштән һәм 6 йәштән яһала. Әгәр вакцинация ваҡытында үткәрелмәһә йәки ҡыҙылсаға ҡаршы прививкалар тураһында мәғлүмәт булмаһа, ул өлкәндәргә шулай уҡ 2 этапта 3 ай арауыҡта үткәрелә. Бер тапҡыр прививка яһатҡан өлкәндәр икенсегә лә яһатырға тейеш. Вакцинаны ике тапҡыр ҡулланғандан һуң 95 процент осраҡта иммунитет барлыҡҡа килә. Ҡыҙылсанан прививканы йәшәү урыны буйынса поликлиникала бушлай яһатырға мөмкин. Был етди сирҙән үҙеңде теләһә ҡайһы йәштә лә һаҡларға кәрәк! Ваҡытында прививка яһатығыҙ һәм сәләмәт булығыҙ! Сығанаҡ: cgon.rospotrebnadzor.ru