"Бөтә көсөм һәм уйҙарым, бөтә энергиям – ул Башҡортостан"

4 майҙа Өфөнөң «Торатау» конгресс-холында Башҡортостан Башлығы Радий Хәбиров «Яҡташлыҡ көсө» икенсе форумының пленар ултырышында ҡатнашты. Унда төбәк етәксеһе башланғысы менән 2021 йылда старт алған «Атайсал» проектының ошо осорға тиклемге йомғаҡтары тикшерелде. Конгресс-холл фойеһында республика Башлығы социаль әһәмиәтле проекттар менән таныштырған һәм атайсалға ярҙам иткән меценаттар хаҡында һөйләгән экспозицияны ҡараны. Башҡортостан Башлығы Хакимиәте етәксеһенең беренсе урынбаҫары Урал Килсенбаев «Атайсал» проектының зона форумдары уҙғанын хәтергә төшөрҙө. Улар Асҡын, Ҡырмыҫҡалы, Туймазы, Дүртөйлө, Мәләүез һәм Баймаҡ ҡалаларында үтте. Ә 2021 йылдың 1 мартынан 2023 йылдың 28 апреленә тиклем «Атайсал» проекты порталында бөтәһе 17,8 мең ғариза урынлаштырылған. Саралар, акциялар, күргәҙмәләр һәм фестивалдәр үткәреү инициативалары алдынғылыҡты биләй – 6,5 мең ғариза. Бынан тыш, проекттарҙың байтаҡ өлөшөн йорттарҙы һәм йәмәғәт киңлектәрен ремонтлау һәм төҙөкләндереү, шулай уҡ китаптар сығарыу һәм китапханаларҙың китап фондын тулыландырыу, сәнғәт, кино, әҙәбиәт һәм журналистикаға ярҙам итеү тәшкил итә. «Атайсал» проекты 4,6 меңдән ашыу ҡатнашыусы-меценатты берләштерҙе, улар бәләкәй ватанға ярҙамға 1,2 миллиард һумдан ашыу аҡса һалды. Бирелгән ғаризаларҙың 16,5 меңе ғәмәлгә ашырылған да инде. *** Пленар ултырышта төбәк Башлығы проектта ҡатнашыусыларға бәләкәй ватанға ярҙам иткәндәре өсөн рәхмәт әйтте, дәүләт наградаларын һәм «Атайсал» иҫтәлекле билдәләрен тапшырҙы. - Бөгөн бында уңыштарға өлгәшкән, ил һәм тыуған республика өсөн күп эштәр башҡарған кешеләр йыйылды. «Атайсал»дың төп идеяһы – көстәрҙе берләштереү. Был бик мөһим. Барығыҙға ла рәхмәт. Һеҙ – беҙҙең ғорурлыҡ һәм өлгө, - тип һыҙыҡ өҫтөнә алды Радий Хәбиров. – Көсөбөҙҙө тик яҡшы эштәргә йүнәлткәндә, ысын мәғәнәһендә файҙа килтерәбеҙ. Был проект республикабыҙҙы нығыта ғына. Төбәк етәксеһе яҡташтарҙың үҙ ойошмаһында ҡатнашыусыларға һәм уларҙың ғаиләләренә ярҙам итеүенең ҙур әһәмиәтен билдәләне. - Бөгөн махсус хәрби операция шарттарында яҡташтар төшөнсәһе яугирҙәребеҙ һәм уларҙың ғаиләләре хаҡында хәстәрлек күреүҙе аңлата. Ватанды һаҡлаусыларға ярҙам күрһәткән һәр кемгә айырым рәхмәт һүҙҙәре еткерәм, - тине Радий Хәбиров. - Республика Донбассҡа 71 гуманитар конвой ебәргән дә инде. Махсус хәрби операция зонаһына дүрт башҡорт батальоны китә. Яҡын арала тағы бер ирекле подразделение юлланасаҡ. Был илебеҙҙең терәге. Һәм һеҙҙең ярҙамығыҙ улар өсөн бик мөһим. Төбәк етәксеһе «Башнефтегеофизика» компанияһының генераль директоры Рөстәм Адиевты билдәләп китте, ул тәүге көндәрҙән үк хәрбиҙәргә ярҙамға ҡушылды, уларға тиҫтәләгән берәмек техника ебәрҙе. Ә Севастополдә йәшәгән Башҡортостан ҡыҙы Алина Марьина госпиталдәрҙә яралы яугирҙәргә ярҙам итә. – Бындай миҫалдар бик күп. Изге эштәр башҡарғанда, беҙ үҙебеҙ яҡшыраҡ һәм көслөрәк булабыҙ. Беҙ тарихта "геройҙар дәүере" тип аталған осор булыуы менән ғорурланырбыҙ, – тип йомғаҡ яһаны Радий Хәбиров. - Бәләкәй ватаным тураһында һүҙ йөрөткәндә, тыуған ауылым - Ишембай районындағы Сайран, мин уға ярҙам итәм. Һәм, әлбиттә, хәҙер минең өсөн бөтә көсөм һәм уйҙарым, бөтә энергиям – ул Башҡортостан. Сығанаҡ: glavarb.ru