Башҡортостан “Яңы заман өсөн көслө идеялар” форумында иң әүҙем биш төбәк иҫәбенә инде. Башҡортостан “Яңы заман өсөн көслө идеялар” форумының перспективалы брендтары конкурсында ҡатнашыуға ғаризалар һаны буйынса тәүге бишәү иҫәбенә инде: республика халҡы 1 403 ғариза тапшырған. Форумға ярашлы уҙғарыласаҡ перспективалы брендтар конкурсына илдең бөтә төбәктәренән биш номинация буйынса 3,5 меңдән ашыу ғариза килгән. Улар араһында – аҙыҡ-түлек, ҡулланыусылар тауарҙары, креатив индустриялар, мәғлүмәт технологиялары, юғары технологиялар. Брендтар конкурсы бизнесҡа үҫешергә һәм киңерәк танылыу яуларға ярҙам итә. Тап шуға ла ойоштороусылар – Стратегик башланғыстар агентлығы һәм Росконгресс фонды – “Яңы заман өсөн көслө идеялар” форумына һәм перспективалы брендтар конкурсына ғаризалар ҡабул итеүҙе 21 майға тиклем оҙайтты. - Беҙ граждандарҙың “Яңы заман өсөн көслө идеялар” форумына, шулай уҡ перспективалы ватан брендтары конкурсына ҡыҙыҡһыныуын күрәбеҙ. Беҙгә конкурсҡа ғаризалар әҙерләүгә күберәк ваҡыт биреү үтенесе менән бик күп мөрәжәғәт килә. Тап шуға күрә һайлап алыу ваҡытын 21 майға тиклем оҙайтырға ҡарар иттек, - тип белдерҙе Рәсәй Президенты ярҙамсыһы Максим Орешкин. - Башҡортостанда республика һәм ил үҫешенә битараф булмаған һәм яҡшы яҡҡа үҙгәрештәр индереү өсөн үҙ тәжрибәһе һәм идеялары менән уртаҡлашырға әҙер әүҙем граждандар күп. Был тәҡдимдәр иҡтисадыбыҙҙы һәм йәмғиәтебеҙҙе үҫтереү өсөн яңы стимул бирер, ә иң уңышлы тәжрибәләр бөтә Рәсәйгә таралыр, тип ышанам, - тип билдәләне Башҡортостан Республикаһы Премьер-министры Андрей Назаров. “Яңы заман өсөн көслө идеялар” форумы һәр кешегә Рәсәйҙәге ыңғай үҙгәрештәргә йоғонто яһарға, артабан берлектә эшләү өсөн әүҙем лидерҙар, эксперттар һәм партнерҙар командаһын билдәләргә мөмкинлек бирә. 2022 йылда крауд-платформала илдең 85 төбәгенән 300 мең кеше теркәлгән, улар 19 500 идея менән уртаҡлашҡан. Быйыл әлеге ваҡытҡа алты йүнәлеш буйынса 12 меңдән ашыу тәҡдим ҡабул ителгән. Шуларҙың 1878-е – Башҡортостан халҡынан. Илде үҫтереү буйынса идеяларҙы 2023 йылдың 21 майына тиклем крауд-платформала индерергә мөмкин. Идеялар киләһе алты йүнәлеш буйынса ҡабул ителә: милли социаль башланғыс, эшҡыуарлыҡ, милли кадрҙар инициативаһы, һанлы сервистар, милли кадрҙар сәйәсәте, һанлы сервистар, милли экологик башланғыс һәм милли технологик башланғыс. Форумдың коммуникациялар партнеры – “Төбәктәр диалогы” автономлы коммерцияға ҡарамаған ойошмаһы. Фото: 74foto.ru