Бөгөн "Асылыкүл" тәбиғәт паркында Башҡортостан Башлығы Радий Хәбиров тәҡдиме буйынса ағас ултыртыу акцияһы бара. Сарала Башҡортостандың Тәбиғәттән файҙаланыу һәм экология министрлығы, Айырыуса һаҡланған тәбиғәт биләмәләре дирекцияһы, Алға һәм Ҡыҙрас ауылдары биләмәләре хакимиәттәре вәкилдәре ҡатнаша. Йәмғеһе 50-нән ашыу кеше йыйылды. - Әлеге акция барышында 15 мең төп шыршы һәм тал ағастары ултыртыла. Шыршылар бер йылғы. Былтыр орлоҡ сәсеп, дирекция хеҙмәткәрҙәре үҙҙәре үҫтереп алған үҫентеләр айырыуса ҡәҙерле. "Асылыкүл" тәбиғәт паркы хеҙмәткәрҙәре уларҙы ҡарап торасаҡ, бер нисә тапҡыр һыу һибәсәк. Был ағастар күлде һайығыуҙан һаҡлар тип ышанабыҙ, - ти Айырыуса һаҡланған тәбиғәт биләмәләре дирекцияһы етәксеһе Таһир Бәдертдинов. Әйткәндәй, ғалим, биология фәндәре докторы, академик, профессор Алексей Кулагин да бөгөн акцияла ҡатнаша.Ул күлде һайығыуҙан ҡотҡарыу буйынса ғилми проект яҙған. Ағастар тап ошо проектҡа ярашлы ултыртыла. Киләһе акция 12 майҙа үтәсәк. Уның барышында 10 мең ағас ултыртыласаҡ. Дирекция сарала ҡатнашырға теләүселәрҙе Асылыкүл буйында көтә. Ә һеҙ быйыл ағас ултырттығыҙмы? Автор фотолары.