Бер кем дә тормошо һәр саҡ матур, яҡшы һәм уңышлы мәлдәрҙән генә торор тип инана алмай. Ни тиһәң дә, һәммәбеҙҙең йәшәйеше үҙенсәлекле һәм ҡабатланмаҫ. Кемдер яҙмышына күндәм генә булып көн итһә, бәғзеләр тормош һынауҙарына аптырап ҡалмай, уның юлдарын хатта үҙҙәре теләгәнсә үҙгәртеп ебәреүсән. Бына Роза ла тап шундайҙарҙан. Уның тормошо ҡасандыр әкиәтте хәтерләтә ине. Һәр хәлдә ҡатынды яҡындан белмәгәндәр тап шулай уйлағандыр, моғайын. Ире менән икәүләшеп йәш саҡта уҡ эшҡыуарлыҡ менән шөғөлләнә башлағайнылар. Шулай итеп, байтаҡ ваҡыт үтеп, ярайһы ғына тәжрибә туплағас, фирма ойошторҙолар. Ҡыҙҙары ла күптән юғары белем алып, үҙ ғаиләһен ҡорҙо. Ул ата-әсәһенә ауырлыҡ килтермәй, шулай уҡ ире менән эшҡыуарлыҡ менән шөғөлләнәләр. Тик бына ҡыҙҙары башлы-күҙле булғас ҡына ҡатын үҙенең бай, мул, етеш, әкиәти тормошта бөтөнләй яңғыҙ, хатта күңел асып һөйләшер кешеһенең юҡлығын асыҡланы. Эштә генә ул һәр кемгә кәрәкле етәксе, оҫта ойоштороусы, яҡшы иҡтисадсы һәм бай тәжрибәле юрист. Шуға ҡатын фирманың үҙәк өлөшө булһа, ире – теле телгә йоҡмаған, һәр кем менән тиҙ аралашып китә алған Зәбир – төрлө килешеүҙәр төҙөү, яңы бәйләнештәр булдырыу менән шөғөлләнде. Шулай ғаилә карабы тормош “тулҡын”дары буйлап һәүетемсә генә йөҙҙө: эш тә, шәхси тормош та алға барҙы. Тик һуңғы йылдарҙа ҡатындың сәләмәтлеге ҡаҡшай башланы, шуға ул бер ваҡыт дауаханала һаулығын нығытып алмаҡсы булды. Бының өсөн ҡаршы булырлыҡ бер ниндәй ҙә сәбәп юҡ: фирмала баш булып ире ҡаласаҡ, эш иһә күптән яйға һалынған, ҡыҙының тормошо ла, күҙ теймәһен, яҡшы ғына. Шулай итеп, дауаханала ваҡыт һиҙелмәй генә үтте лә китте һәм Роза, иренә сюрприз эшләйем тип, такси менән үҙе ҡайтырға булды. Тик фатирҙың шылтыратыу өсөн тәғәйенләнгән төймәһенә баҫҡас, ишекте бер кем асырға ашыҡманы. “Бәй-бәй, был ваҡытта Зәбир өйҙә булырға тейеш”, – тип уйлап алды ла ҡатын, тағы шылтыратты. Асып инер ине лә бит, дауаханаға тип юлланғас, өҫтәүенә үҙен ире оҙатҡас, торлаҡ асҡысын алмағайны шул. Был юлы ишек асылды. Тупһала Зәбир тора ине... Ә уның артында – Земфира. Теге үҙҙәренең фирмаһында секретарь булып эшләгән ҡыҙ. Розаның аяҡ аҫтында ер ишелгәндәй тойолдо, бындай хыянатты иренән ул һис көтмәгәйне. Беренсе мөхәббәте булған иренә шул тиклем ышана ине шул... Бер һүҙ ҙә өндәшмәне ҡатын, әйберҙәрен сумаҙанына тейәне лә, ҡала эргәһендәге ҡасабаларҙың береһендәге өйҙәренә юлланды. Саҡ барып етте унда: машина рулен ипкә килтерә алмай ыҙаланы, күҙенән туҡтауһыҙ йәш аҡты. “Өнмө, төшмө был хәл? – тип бөтөрөндө Роза. – Ни өсөн? Ниңә былай килеп сыҡты әле?” Ошондайыраҡ һорауҙар ҡатындың башын туҡтауһыҙ игәне лә игәне. Әллә күпме аңҡы-тиңке килеп йөрөнө ҡатын. Бер аҙ тынысланғас, мәрхүм атаһының яратҡан һөнәре – умартасылыҡ менән шөғөлләнергә ҡарар итте. Фирмаларын да ҡыҙҙарына яҙҙырҙы. Ә бының өсөн балаһын оҙаҡ ҡына өгөтләргә тура килде, сөнки уныһы ризалашмай маташты. Аңлашыла, егерме йылдан ашыу көнө-төнө тигәндәй эшләп, намыҫлы хеҙмәте менән күтәргән фирмаһын бер ҙә иренең йәш һөйәркәһенә ҡалдырғыһы килмәне ҡатындың. Аҙаҡ Роза хат аша иренә айрылышыу тураһында ғариза яҙыуы хаҡында белдерҙе... Ҡатын кире ҡалаға ҡайтырға теләмәне. “Умартасылыҡ менән шөғөлләнһәң ине. Олатайың да ҡорт тотто. Аҙаҡ уны миңә мираҫ итеп ҡалдырҙы. Ә мин ошо умартасылыҡ ерен һиңә ҡалдырам. Ҡасан да бер тотонорһоң әле, моғайын, был эшкә. Тик бына бал ҡорттары уңғандарҙы ярата, үҙҙәренә даими иғтибар талап итә - шуны онотма, ҡыҙым”, – атаһының әйткән һүҙҙәре иҫенә төштө. Бал ҡорттары менән башта “дуҫлашыуы” еңел булманы Розаға. Баҡтиһәң, быны күршеһе Ринат та күҙәтеп йөрөгән икән. “Шунан күстәр менән эш барамы?” – тип өндәште ул бер көн. Үҙ уй-хәстәренә күмелгән Роза башын күтәрҙе. Ә унда сәсенә сал төшкән, оҙон буйлы ир йылмайып ҡарап тора ине. “Күпме тырышһам да, эшем килеп сыҡмаҫ кеүек тойола, – тип яуапланы ҡатын. – Ә һеҙ кем һуң?” “Күршегеҙ мин. Исемем – Ринат. Ғүмер буйы умартасылыҡ менән шөғөлләнәм. Теләһәгеҙ, һеҙҙе лә уның серҙәренә өйрәтәм”, – тине күршеһе. “Ярай” тигән мәғәнәлә баш һелкте лә ҡатын, үҙ проблемаларынан тыш, эргә-тирәләге бер нәмәне күрмәүенә аптырап ҡуйҙы. Шулай итеп, Ринат күршеһе Розаға умартасылыҡ буйынса ярҙам итә башланы. Был ғына түгел, икәүләшеп балыҡҡа ла йөрөй башланылар. Бынан тыш, икәү уртаға һалып һөйләшерлек темаларҙың күплеге асыҡланды. “Беләһегеҙме, хатта ҡап-ҡара булып төн килһә лә, унан һуң ҡояшлы таң ата”, – ти хәҙер Роза... Фото: vk.com/med_s_paseki