Борай районының Ленин исемендәге хужалығында эшләүсе кассир, уңған һәм яуаплы хеҙмәткәр Диниә Сәләхованы белмәгән кеше юҡ. Алсаҡ йөҙлө, йомшаҡ күңелле ханым бына тигән ике улына ҙур терәк. Тәү ҡарашҡа нескә, тыйнаҡ, наҙлы тойолған ҡатындың батыр йөрәкле әсә икәнен улдары булмыштары менән раҫлай. Егеттәрҙең икеһе лә эшһөйәр һәм кешелекле. Вадим – нефтсе, ә Айҙар бөгөн махсус хәрби операцияла ҡатнашып, Ватаныбыҙ тыныслығын һаҡлай. Әсәнең ҡәҙерле улдары өсөн йән атып, һаулыҡтары өсөн борсолоп ғүмер итеүе сер түгел. – Хаҡлы ялда булһам да, һаман эшләп йөрөүемә шатланып бөтә алмайым. Ауылдаштарым менән бергәләп ил байлығын арттырыуға өлөш индерә алыуыма Хоҙайға рәхмәт. Эштә булғанда төрлө яман уйҙар күңелгә ояламай, иптәштәрем менән аралашыу рәхәтлек бирә. Ауыр мәлдәрҙә бергә эшләгән ҡыҙҙар менән һөйләшеп ултырыу үҙе бер ғүмер, улар миңә таяныс, – ти Диниә ханым. Бәләкәй Баҙраҡ ауылында колхозсылар ғаиләһендә донъяға килгән ҡыҙ бала тиҫтерҙәре һымаҡ ауыл тормошонда ҡайнап үҫә. Ата-әсәһе хужалыҡ эшенән бушай алмағанға күрә, йорт мәшәҡәттәре Диниә иңенә төшә. Ҡыҙ һәйбәт уҡый. Мәктәпте тамамлағас, Өфө ҡалаһындағы техник училищеға уҡырға инә. –Үҙ теләгем менән индем уҡырға, шуғалыр ҙа белем алыу еңел бирелде. Бында үҙемә бик күп дуҫтар таптым. Әле лә улар менән аралашып йәшәйем, шул күңелле студент йылдарын һағынам, - тип йылмая Диниә Сәләхова. Йәш белгес хеҙмәт юлын электр лампалары заводында монтажсы булып башлай. Ҡыҙ бала өсөн бында эшләүе еңел булмаһа ла, Диниә барыһына түҙә, эшкә тиҙерәк төшөнөргә тырыша. Аҡрынлап эштәр яйлана, үҙ һөнәренең нескәлектәрен яҡшы үҙләштергән, һәр ваҡыт ярҙамға килергә әҙер торған ҡыҙ коллективта хөрмәт ҡаҙана. Биш йылдан һуң яҙмыш елдәре уны тыуған ауылына ҡайтара. Тик Баҙраҡта эш урындары ла, завод та юҡ. Шулай ҙа Диниә ҡайҙа барырға, ниндәй эшкә урынлашырға тип баш ватмай, тота ла ауылдағы магазинға һатыусы булып урынлаша. Аҙаҡ кассир һөнәрен үҙләштерә. Хәҙер инде ул Ленин исемендәге хужалыҡтың алыштырғыһыҙ хеҙмәткәре. Диниә ханымға һаулыҡ, күңел тыныслығы насип итеүен, улдары менән оҙайлы бәхетле ғүмер кисереүен теләйбеҙ. Гөлназ Хужина. Автор фотоһы.