Еңеү көнө алдынан “Ярлыҡау” фильмын ҡарағыҙ

4 майҙа Рәсәй прокатына “Ярлыҡау” (“Помилование”) хәрби драмаһы сыға (В преддверии Дня Победы 4 мая в российский прокат выходит военная драма “Помилование”). 2 майҙа Өфөлә “Синема Парк Галерея Арт” кинотеатрында “Ярлыҡау” премьераһының махсус тамашаһы үтте. Фильм нигеҙендә башҡорт совет әҙәбиәте классигы Мостай Кәримдең шул уҡ исемле повесы ята. Премьералар Мәскәүҙә, Өфөлә һәм Ҡазанда үтәсәк. Сюжет үҙәгендә 20 йәшлек сержант – танкист Любомир Зухтың тарихы ята. Ул яҙмыш тарафынан алыҫ ауылға килтерелгән испан коммунистарының ҡыҙы, йәш Мария-Терезаға үлеп ғашиҡ була. Ҡыҙҙың да егеткә хистәре тоҡана. “Отбой” командаһы яңғырағандан һуң, сержант һөйгәне менән осрашыуға йүгереп килә, уны хушлашыу өсөн ҡосаҡлай һәм алыш алдынан төп һүҙҙәрен әйтә. Әммә ул һуғыш ваҡыты закондары буйынса иң юғары яза янаған енәйәт ҡылыуын аңламай. - Йәштәр араһында “Тағы ла һуғыш тураһында” тигән стереотип бар. Кино һуғыш тураһында түгел. Мөхәббәт, йәштәр тураһында. Шуға күрә, әгәр тамашасы шул стереотипты үтеп, фильм ҡарарға килһә, ул беҙҙең тамашанан күңеле тулып сығасаҡ. Хатта күҙ йәштәрен һөртәсәк, тип уйлайым. Тамашасылар күп булыр тип көтәм. Картинаның прокатсыһы "Беҙҙең кино" (“Наше кино”) - уңышлы компания. Киноны бөтә Рәсәй буйлап 1700 кинотеатрҙа күрһәтәсәктәр. Был - беҙҙең иң яҡшы эшебеҙ”, – тине “Ярлыҡау” фильмының ҡуйыусы режиссеры Айнур Асҡаров. Съемкалар Белоруссияла һәм Ленинград өлкәһендә үткән. Хәрби-тарихи ваҡиғалар барған картинаны 23 смена эсендә төшөргәндәр. Тағы ла режиссер фильм төшөрөү процесының иҫ киткес яҡшы ойошторолоуы тураһында әйтеп үтте. Барыһы ла теүәл иҫәпләнгән. Мөмкин тиклем тиҙерәк, шул уҡ ваҡытта бер ҡайҙа ла ашыҡмай төшөрөлгән. “Ярлыҡау” повесы – иҫ киткес күңелгә үтеп инеүсән тарих, - ти продюсер Дмитрий Фикс, – һуғыш тураһында хәтирәләр, авторҙың тормош тәжрибәһе менән үрелеп, фажиғәле нигеҙгә хикәйәләүҙең лирик, бик нескә эмоциональ тонын бирә. Автор бөтә геройҙарға ла күп һөйөү һәм шәфҡәтлелек һалған, ә беҙ тарихты тамашасы быны теүәл тойорлоҡ итеп һөйләнек”. Фильмдың продюсерҙары – Мостай Кәрим повесы буйынса “Һеңлекәш” блокбастерын ижад иткән Тимербулат Кәримов, Михаил Курбатов һәм Дмитрий Фикс. Фильмдың сценарисы – Айҙар Аҡманов. Хәрби дуҫтарҙың төп ролдәрен Александр Новиков (“Пищеблок”, “Жиза”), Николай Ғәлләмов (“Сердце Пармы”, “Сама дура”), Евгений Михеев (“Летчик”, “Вампиры средней полосы”) башҡара. Любомир Зухтың һөйгән ҡыҙын йәш актриса-дебютант Йәмилә Мөҙәрисова уйнай. Фильмда шулай уҡ тәжрибәле артистар Гела Месхи (“1941. Крылья над Берлином”, “Летчик”), Юрий Лопарев (“Завод”, “Калашников”), Александр Бухаров (“Ржев”, “Лев Яшин. Вратарь моей мечты”) һәм Любовь Зайцева (“Живой”, “Точка”) ҡатнаша. Оператор – Андрей Макаров (“Небо в алмазах”, “Реальная сказка”, “Елки 2”). Ҡуйыусы рәссам – Вячеслав Виданов (“Һеңлекәш”, “Личная жизнь королевы”, “Женщин обижать не рекомендуется”, “Берёзка”). Костюмдар буйынса рәссамдар – Яна Боуден (“Һеңлекәш”, “Все началось в Харбине”, “Восьмидесятые”), Ирина Гришан (“Чернобыль”, “Невезучая”, “Привет от Катюши”). Дистрибьютор булып “Наше кино” компанияһы сығыш яһай. Фотолар: kinopoisk.ru, bashinform.ru