«Ոչ Արցախի էթնիկ զտմանը» շարժման մասնակիցները, հանրահավաք անցկացնելով Ստեփանակերտ-Շուշի ճանապարհին, այնտեղ տեղադրել են «Ազատ Արցախը ողջունում է ձեզ» մակագրությամբ պաստառ։
Համապատասխան լուսանկարները Facebook-ում հրապարակել է ակցիայի մասնակից Դավիթ Բագիրյանը։ Պաստառի վրա նաև ջնջելու նշանով ընդգծվել է ադրբեջանական անցակետի պատկերը, որը տեղադրվել է ավելի վաղ Լաչինի միջանցքում։
Ավելի վաղ շարժման մասնակիցները վրաններ էին տեղադրել Ստեփանակերտ-Շուշի ճանապարհին և սկսել անժամկետ ակցիա՝ պահանջելով հեռացնել Բերձորի միջանցքում ապօրինաբար տեղադրված ադրբեջանական անցակետը։
Նախաձեռնության մասնակիցները ստորագրահավաք են սկսել նաև change.org կայքում՝ պահանջելով վերջ տալ Արցախում Ադրբեջանի կողմից իրականացվող էթնիկ զտումների ու ցեղասպանության քաղաքականությանը։