Еңеү салюты ла буласаҡ!

Башҡортостандан махсус хәрби операцияла ҡатнашыусылар 9 Майҙа Өфөләге Еңеү парадында ҡатнаша. Яугирҙәр парад расчеттары составында тәүгә Октябрь проспекты буйлап тантаналы марш менән үтәсәк. Был хаҡта бөгөн Башҡортостан Башлығы Радий Хәбиров уҙғарған оператив кәңәшмәлә республика Хөкүмәте вице-премьеры Ирек Сәғитов белдерҙе. Өфөлә Бөйөк Ватан һуғышында Еңеүҙең 78 йыллығына арналған төп тантана Рәсәй Геройы, генерал-майор Миңлеғәле Шайморатов һәйкәленә сәскәләр һалыуҙан башлана. Тантана иртәнге сәғәт 10-да Совет майҙанында уҙа. 11:00 сәғәттә Еңеү паркындағы мемориаль комплекста Мәңгелек утҡа сәскәләр һалыу тантанаһы үтәсәк. Иртәнге сәғәт 12-лә Октябрь проспектында хәрбиҙәр һәм хәрби техника парады Еңеү көнөнөң төп сараһы буласаҡ. Смотрҙа 21 парад иҫәбе ҡатнаша. Составында – Өфө территориаль гарнизонының 1,5 меңдән ашыу хәрби хеҙмәткәре, хәрби хәрәкәт ветерандары, курсанттар һәм кадеттар. – Быйыл беренсе тапҡыр Октябрь проспекты буйлап махсус хәрби операцияла ҡатнашыусылар һәм диңгеҙ пехотасыларының кадет кластары үтәсәк, – тине Ирек Сәғитов. – Артабан Бөйөк Ватан һуғышы заманындағы хәрби техниканан һәм хәҙерге хәрби машиналарҙан механизацияланған колоннаһын үткәрергә ниәтләйбеҙ. Парадты бәләкәй авиация вертолеттары һәм самолёттары тамамлай. Ә 23:00 сәғәттә баш ҡаланың Ленин исемендәге майҙанында Еңеү көнө хөрмәтенә байрам салюты буласаҡ. Өфө хакимиәте башлығы вазифаһын башҡарыусы Сергей Кожевников йәмәғәт транспорты эшен ойоштороу тураһында һөйләне. 6 майҙан 9-ына тиклем ҡала пассажирҙар транспорты ял көнө графигы буйынса йөрөй. 9 майҙа Еңеү парады ваҡытында Октябрь проспектынан үткән автобустарҙың хәрәкәт схемаһы үҙгәрә. – 22:30-ҙан 23:30-ға тиклем Дим, Затон, Сипайлово, “Йәшел сауҡалыҡ” биҫтәләренә, шулай уҡ ҡаланың төньяҡ өлөшөнә һәм тарихи үҙәккә хәрәкәт иткән маршруттарҙа йәмәғәт транспорты һанын арттырырға ниәтләйбеҙ, - тине Сергей Кожевников. - Еңеү көнөндә йәмәғәт транспортының эш ваҡыты төнгө 1-се яртыға тиклем оҙайтыла. Йәмәғәт тәртибен һаҡлауҙы республика Эске эштәр министрлығы хеҙмәткәрҙәре өҫтәмә көстәр менән берлектә тәьмин итә - бөтәһе 1,2 мең кеше. Радий Хәбиров яуаплы хеҙмәттәргә байрам сараларының хәүефһеҙлегенә айырыуса иғтибар бүлергә ҡушты. – Муниципалитет башлыҡтарынан махсус хәрби операцияла ҡатнашыусыларҙы, хәрби хеҙмәткәрҙәрҙең туғандарын һәм яҡындарын байрамдарға йәлеп итеүҙәрен һорайым, – тине республика Башлығы – Әле яугирҙәребеҙ отпускыға ҡайта, уларҙы мөмкин тиклем күберәк йәлеп итергә кәрәк. Фото: Башҡортостан Башлығы сайты.