Մահացել է ռուս դիզայներ Վալենտին Յուդաշկինը։ Այս մասին հայտնել է TASS-ը։
Յուդաշկինը 59 տարեկան էր։
Նրա մահվան պատճառների մասին այլ մանրամասներ հայտնի չեն։
1991 թվականին Փարիզում ներկայացվել է Յուդաշկինի առաջին հավաքածուն, որը բաղկացած էր 150 մոդելից։
2010 թվականի հուլիսի 30-ին Յուդաշկինը դարձել է Ռուսաստանի «Առաջին ալիք»-ի «Նորաձևության դատավճիռ» շոուի հաղորդավարը։ 2012 թվականի փետրվարից Յուդաշկինն ընտրվել է Ռուսաստանի պարային սպորտի միության նախագահ, իսկ ապրիլից դարձել է «Ոճ և նորաձևություն» շուրջօրյա հեռուստաալիքի գլխավոր խմբագիրը։
Նա մի շարք բրենդների հիմնադիր է։ 1996 թվականին «Valentin Yudashkin» նորաձևության տունն ստացել է Փարիզի բարձր նորաձևության սինդիկատի թղթակից-անդամի կարգավիճակ։ 1997 թվականին Մոսկվայում բացվել է «Valentin Yudashkin» առաջին բուտիկը։ Վալենտին Յուդաշկինի նորաձևության տունը Ռուսաստանում առաջատարներից մեկն է։ Ընկերությունն ունի բրենդային բուտիկների ցանց, դիզայների ցուցադրությունները անցկացվում են Փարիզում, Միլանում, Նյու Յորքում և Մոսկվայում։ Յուդաշկինի աշխատանքները Լուվրի կոստյումի թանգարանի, Մոսկվայի պետական պատմական թանգարանի, Կալիֆոռնիայի նորաձևության թանգարանի ցուցանմուշներն են։
2016 թվականին «Valentin Yudashkin» նորաձևության տունը դարձել է Ֆրանսիայի ֆեդերացիայի բարձր նորաձևության, «pret-a-porte»-ի և մոդելավորողների լիիրավ անդամ։ Սա ռուսական նորաձևության առաջին բրենդն է, որն արժանացել է այդ անդամակցությանը։