Басу эшләре барышы белән безне район авыл хуҗалыгы идарәсенең баш агрономы Хәлил Минһаҗев таныштырды.Хәлил Ислам улы әйтүенчә, быел районда язгы чәчү 37 мең гектарда үткәреләчәк, 5877 гектар мәйданны уҗым культуралары били.– Быелгы чәчү өчен җитәрлек күләмдә – 6,6 мең тонна орлык әзерләнде, шуның 1 мең тоннасы – элиталы. Орлыклар барысы да агроталәпләр буенча агуланды, сыйфаты белгечләр тарафыннан тикшерелеп, кондицияле дигән мөһер алды, – дип бәян итте баш агроном. – Минераль ашламалар кайтарту турында да вакытында хәстәрлек күрелде: алар 1400 тонна күләмендә тупланды. Әйтергә кирәк, бу былтыргыга караганда күбрәк.Чәчүгә беренчеләрдән булып Ленин исемендәге, “Колос”, “А-7 Агро” хуҗалыклары һәм фермер Раил Ахунов төште. Башка хуҗалыклар да алардан калышмаска тырыша, бүген инде районның һәр төбәгендә кызу эш кайный.Борай игенчеләре язның һәр минутының кадерен белеп хезмәт сала. Бүгенгә ике фермер – Ринаф Якупов һәм Марсель Нурисламов язгы чәчү эшләрен төгәлләп тә куйган. Ә район күрсәткечләренә килгәндә, чәчү 9700 гектарда башкарылган, бу планның 26 проценты дигән сүз. 2200 гектарда – бодай, 3800 гектарда – арпа, 1200 гектарда – борчак, 200 гектарда – җитен, 2100 гектарда берьеллык үләннәр чәчелгән.Шунысын да әйтергә кирәк: ел саен Борайда чәчү мәйданнары арттырылып килә. Бу – моңа кадәр эшкәртелми яткан басуларны яңадан әйләнешкә кертүнең күркәм нәтиҗәсе. Үсемлекчелек, терлекчелек өлкәсендә эш башлаучы фермер хуҗалыклары өчен җирләр бүленеп рәсмиләштерелә. Быел исә бөртекле һәм кузаклы культураларның мәйданы, былтыргыга караганда, 2 мең гектарга күбрәк булачак, ә гомумән алганда, моңа кадәр эшкәртелми яткан басуларның тагын да 2500 гектарында иген үстерелә башлаячак.– Кайчандыр чәчү әйләнешеннән төшеп калган, ташландыкка әверелгән басуларга җан өрү арытаба да дәвам итәчәк, – ди баш агроном.Ут кебек кызу чорда тоткарлыклар килеп чыкмасын өчен техниканың көчле, төзек булуы да кирәк. Борайда хуҗалыкларның матди-техник базасын яңарту өстендә дә даими эшләргә тырышалар.– Техника көйле, ягулык-майлау материаллары да җитәрлек, – ди Борай игенчеләре. – Быел җирдә дым әллә ни күп түгел, ул югалганчы орлыкларны җир куенына иңдерергә кирәк, дип, җиң сызганып эшлибез.Миләүшә Латыйпова,“Кызыл таң”ның үз хәбәрчесе.Борай районы. Рәсемдә: Ранис Мостафин. Фото: Гөлназ Хуҗина.