2 майҙан йәштәр сәйәсәте өлкәһендәге Башҡортостан Башлығы гранттары конкурсы (Конкурс грантов Главы Республики Башкортостан для НКО на поддержку проектов в сфере молодежной политики) старт алды. Унда Башҡортостан биләмәһендә кәмендә бер йыл элек теркәлгән коммерцияға ҡарамаған ойошмалар ҡатнаша ала. Конкурс тематикалары түбәндәгесә: Йәштәр хәрәкәте, Ваҡиғалар ойоштороу, Профессионализм, Иҫкәртеү, Мин – гражданин, АртГранит, Медиа, Ирекмәнлек һәм Белем. Быйыл конкурс икенсе тапҡыр үтә. Былтыр 17 коммерцияға ҡарамаған ойошма еңеүсе булғайны. 2022 йылда “Ирекмәнлек” номинацияһында еңеүсе проекттарҙың береһе – “Башҡортостанда юғалған кешеләрҙе эҙләү үҙәге” ойошмаһы тормошҡа ашырған – “Ярҙам эргәлә 2.0” проекты. Маҡсаты – юғалған кешеләрҙе эҙләүгә мөмкин тиклим күберәк Өфө ҡалаһы һәм Өфө районы йәштәрен йәлеп итеү. Йәштәр өсөн төрлө курстар үткәргәндәр. Иғтибарҙы йәлеп иткән былтырғы тағы бер еңеүсе – “Аманат” ойошмаһының “Workspace йәштәр коворкинг-үҙәге” проекты. Уға ярашлы, республиканың көньяҡ-көнсығыш зонаһында коворкинг-үҙәк барлыҡҡа килгән. Был заманса киңлектә оҫталыҡ дәрестәре, белем биреү программалары үтә, республиканың билдәле кешеләре менән осрашыу ойошторола. Конкурста ҡатнашыу өсөн ғаризалар 2 майҙан 31 майға тиклем (17 сәғәткәсә) ҡабул ителәсәк. Ғаризаларҙы грантыглавы102.рф. сайтына ебәрергә кәрәк. Бер проект өсөн максималь грант күләме ике миллион һум тәшкил итә. Проектты тормошҡа ашырыу 2023 йылдың 1 октябренән иртәрәк башланырға тейеш түгел һәм 2024 йылдың 30 сентябренә тиклем тамамланырға тейеш. Тулыраҡ мәғлүмәт сайттың “Документы” тигән бүлексәһендә. Фото: ufa-news.net