Башҡортостан Хөкүмәте хәбәр итеүенсә,"Алға" махсус иҡтисади зонаһы һәм "Өфө" индустриаль паркына инвесторҙар республикаға 80 миллиард һумдан ашыу аҡса һалырға йыйына (Резиденты двух преференциальных зон Башкортостана инвестируют в регион более 80 млрд рублей). Был хаҡта Башҡортостандың төбәк үҫеш корпорацияһында хәбәр итә. Ағымдағы йылдың апреленә ҡарата инвестициялары яҡынса 42 миллиард һум тәшкил иткән, ике меңдән ашыу яңы эш урыны булдырған, 12 компания махсус иҡтисади биләмә резиденты статусына эйә. Индустриаль паркта 18 предприятие эшләй. Уларҙың проекттарына инвестицияларҙың дөйөм күләме 36 миллиард һумдан ашыу тәшкил итә, 600-ҙән ашыу эш урыны булдырыла. — Үҫеш корпорацияһы уларҙың тотороҡло эшләүен һәм үҫешен тәьмин итә. Бөгөнгә Өфөнөң резидент исеме алған 18 ойошмаһының һигеҙе сәнәғәт продукцияһы етештерә, ҡалғандары проектлау өҫтөндә йә төҙөлә. Әлбиттә, хәҙер эшебеҙҙең мөһим өлөштәренең береһе булып 21 мең квадрат метр майҙанлы ететереү комплексын төҙөү тора, унда Беларусь компанияһы «Амкодор» уңыш йыйғандан һуң иген эшкәртеү өсөн машиналар һәм ҡорамалдар етештереү буйынса завод урынлаштырасаҡ. Бынан тыш, Рәсәй тимер юлдары менән берлектә индустриаль паркка альтернатив тимер юл инеү юлын төҙөү өҫтөндә эшләйбеҙ, — ти Башҡортостандың үҫеш корпорацияһының генераль директоры Наил Ғәббәсов. Апрель айына ике компания «Алға» махсус иҡтисади зонаһының потенциаль резиденты тип иғлан ителә. Улар планлаштырған инвестициялар күләме 55 миллиард һумдан ашыу тәшкил итә, 120-гә яҡын яңы эш урыны булдырыла. — Беҙ резиденттар менән даими бәйләнештәбеҙ, уларға килеп сыҡҡан мәсьәләләрҙе хәл итеүҙә ярҙам итәбеҙ. Әйтәйек, төҙөлөш-монтаж эштәре стадияһында әлеге ваҡытта "Фабрика Заспорт" һәм "М Синтез" компаниялары эшләй. Проектлау һәм проектлау алды стадияһында алты ойошма тора, ике предприятие төҙөлөшкә рөхсәт алған. Беҙҙең бурыстарға тейешле инженер инфраструктураһын тәьмин итеү инә. Шуға ла был йүнәлештәге эштәр барлыҡ дүрт участкала ла бик әүҙем бара, — тип өҫтәне Наил Ғәббәсов. Фото Башҡортостан Хөкүмәте сайтынан алынды.