Ҡөрьән уҡылмаған өйҙә яҡтылыҡ аҙ, яманлыҡ күп була

Әғүүҙү билләәһи минәш-шәйтаанир-раджиим. Бисмилләәһир-рахмәәнир-рахиим. Әлхәмдүлилләәһи Раббил ғәәләмиин. Үәссаләәтү үәссәләәмү ғәләә расүүлинә Мүхәммәдин үә ғәләә әәлиһи үә әсхәәбиһи әждмәғиин. Пәйғәмбәребеҙ Мөхәммәд Мостафа салләллаһү ғәләйһиссәләм үҙенең бер хәҙисендә: «Өйҙәрегеҙҙә Ҡөрьәнде мөмкин ҡәҙәр күберәк уҡығыҙ. Сөнки Ҡөрьән уҡылмаған өйҙә яҡтылыҡ аҙ, яманлыҡ күп була һәм унда күңелһеҙ үә борсоулы йәшәйҙәр», — тигән. Ҡөрьән уҡыуҙың ни ҡәҙәр әһәмиәтле икәнен аңлау өсөн, моғайын, ошо хәҙис тә етәлер. Мөьмин-мосолман Ҡөрьән уҡыуҙан күңел тыныслығы, ауырыуҙарына шифа һәм иң мөһиме — тормошонда тура юл таба. Шуның өсөн беҙ Ҡөрьәнде өйрәнергә һәм даими уҡырға тейешбеҙ. Ҡайһы бер кешеләр: «Дөрөҫ уҡыйымы? Еренә еткереп уҡыйымы?» — тигән борсоулы һорауҙар бирә. Әлбиттә, бындай борсолоуҙар урынлы. Аллаһ Раббыбыҙ Ҡөрьәндә (Мүзәммил" сүрәһе 4-се аят): «Үә раттилил Ҡуръәәнә тәртиилә», йәғни: «Ҡөрьәнде тәртип менән уҡығыҙ», — тип белдерҙе. Ғалимдар был һөйләмгә: «Тәртип менән, тәджүид менән, ашыҡмайынса ғына, һүҙҙәрен аңларлыҡ асыҡ итеп уҡығыҙ», — тип тәфсир ҡыла. Шуның өсөн дә Ҡөрьәнде тәджүид ҡәғиҙәһе менән уҡырға тырышырға кәрәк. Өйрәнгәндә хәрефтәрҙең дөрөҫ әйтелешенә һәм уҡыу ҡағиҙәләренә иғтибарлы булыу мөһим. Үҙаллы үҙләштереүгә ҡарағанда, белгән кешенән өйрәнеү хәйерлерәк. Ҡөрьәнде йәки Ҡөрьән сүрәләре яҙылған китапты ҡулға тотоп уҡығанда тәһәрәтле булыу шарт. Ҡөрьән аяттарын күңелдән уҡығанда тәһәрәтле булыу талап ителмәһә лә, тәһәрәтле булһаң, сауабы күберәк. Ҡөрьән тыңларға аш-һыу табынына барыусылар ҙа тәһәрәтле икән, шулай уҡ сауаплыраҡ булыр, ғөсөлһөҙ килеш китапҡа ҡарап та, күңелдән дә уҡыу дөрөҫ түгел. Ҡөрьән уҡый башлағанда «Әғүҙү билләәһи минәш-шәйтаанир-раджиим», тип әйтеү тейеш. Мөмкинлек булғанда Ҡөрьәнде ҡиблаға йүнәлеп уҡыу сауаплыраҡ. Табында иһә йәмәғәткә ҡарап ултырып уҡыла. Ҡөрьән уҡылған урынға Аллаһы Тәғәләнең рәхмәт фәрештәләре килеп, уҡыусыға ла, тыңлаусыларға ла хәйер доға ҡылып торалар. Ҡөрьән уҡыу тамамланғас, фәрештәләрҙең һәм беҙҙең ҡылған доғаларыбыҙ тура килһә, уларҙың ҡабул булыуына өмөт бар. Әгәр ҙә инде изге Китап уҡылған ерҙә кешеләр, тейешле кейемдә булмаһалар, фәрештәләр килмәй икән. Шуға күрә доғабыҙҙың ҡабул булыуына шөбһә тыуа. Шуның өсөн Ҡөрьән уҡыусы кеше ҡатын-ҡыҙҙарға яулыҡ ябынырға, оҙон еңле күлдәк кейергә, иҙеүҙәрен, балтырҙарын ҡапларға тәҡдим итһә, үпкәләргә ярамай. Сөнки табын әҙерләп, Ҡөрьән уҡытыуҙың сауабы ошо сәбәптәр арҡаһында ғына, бик күпкә кәм булырға, йәки бөтөнләй булмауы ла ихтимал. Тимәк, тейешле кейем менән булған кешеләргә уҡылған Ҡөрьән сүрә-аяттары бәрәкәтте арттыра һәм ауырыуҙарына шифа була. Аллаһ Раббыбыҙ Ҡөръәндә («Бәни Исраил» сүрәһе, 82-се аят): «Үә нүнәззилү минәл Ҡуръәәни мәә һүүә шифәәәәүүүә рахмәтуллил мүьминиин. Үә ләә йәзидүз заалимиинә илләә хасәәра», йәғни: «Аллаһ Тәғәләне таныусы, мөьминдәр Ҡөрьән аяттарынан шифа табалар, Аллаһ Тәғәләгә ҡарышыусыларҙың хәсрәте артыр», — тип белдерҙе. "Ҡөрьән уҡыу ике төрлө була. Беренсеһе — үҙенә, икенсеһе — кеше үтенгәне өсөн. Ҡөрьән уҡыусыға — бер хәрефкә 10 сауап, тыңлаусыға, — бер хәрефкә бер сауап, Ҡөрьәнде өйрәнгәндә ғазапланып уҡыусыға сауап икеләтә булыр", — тигән хәҙис тә бар. Тимәк, ҡыйын тип тормаҫҡа, яңынан-яңы аяттарҙы өйрәнергә һәм уҡырға кәрәк. Намаҙ уҡығандан һуң үҙең өсөн, ил-йортобоҙ, ғаиләләребеҙ именлеге-тыныслығы өсөн, һинән доға өмөт итеүсе әруахтарҙың рухы шат булһын өсөн, тип хәйер-доғалар ҡылып, Ҡөрьән уҡыуҙа гонаһ юҡ, хатта ҡайһы бер ерҙәре тейешенсә дөрөҫ булып етмәһә лә. Хата менән булһа ла уҡыу бөтөнләй ҙә уҡымауҙан хәйерлерәк. Шуға күрә Ҡөрьән уҡыуыңды берәр белгән кешегә ваҡыт-ваҡыт, мөмкинлек килеп сыҡҡан һайын тыңлатып, дөрөҫләтеп тороу мөһим. Уҡыған өсөн дә, өйрәнгән өсөн дә, хатаңды тырышып төҙәткән өсөн дә сауап бар. Тимәк, күберәк уҡыу кәрәк. Беҙ ҡайһы ваҡыт кешеләрҙең үтенесе менән кемгәлер барып Ҡөрьән уҡыйбыҙ. Был осраҡта инде талаптар күберәк. Иң беренсе — Ҡөрьән уҡыусы биш ваҡыт намаҙ эйәһе, икенсенән Ҡөрьәнде тәджүид ҡағиҙәләренә ярашлы уҡый белеүе, өсөнсөнән, үҙе Ҡөрьән менән ғәмәл ҡылыусы һәм башҡаларҙы ла вәғәзләп, изге ғәмәлдәр ҡылыусы булырға тейеш. Йома намаҙы ваҡытында аят мәжлестәре үткәреү ярамаҫ. Бында йома көнө менән, йома намаҙы ваҡытын бутарға ярамай. Аят мәжлестәре йә йома намаҙына хәтлем, йә йома намаҙынан һуң үткәрелә. Аллаһ Раббыбыҙ ҡылған ғибәҙәттәребеҙҙән риза булып, хата-кәмселектәребеҙҙе ғәфү итеп, уҡыған Ҡөрьән аяттарын ҡабул ҡылып, әжер-сауаптар насип итһә ине. Үҙебеҙгә ла, балаларыбыҙға ла, яҡындарыбыҙға ла, етәкселәребеҙгә лә Ҡөрьән менән ғәмәл ҡылып, сәждә әһеле булып, рәхәт йәшәүҙәребеҙҙе насип ҡылһа ине. Ошо бер миҙгел генә булған донъянан мәңгелек әхирәтебеҙгә күскәндә иманыбыҙҙы юлдаш ҡылып, Аллаһ Тәғәләнең йәннәт баҡсаларында ла осрашыуҙарыбыҙҙы насип итһен. Әхмәт хажи Шәйәхмәтов, имам-мөхтәсиб. “Йондоҙ” гәзитенән. Фото: ru.pinterest.com Сығанаҡ: https://nazir1965.com/din/ҡөrәn-ҡushҡansa-jәshәү.html