Бөгөн Башҡортостан Башлығы Радий Хәбиров Дәүләкәнгә эш сәфәре барышында мәктәптәрҙе капиталь ремонтлау федераль программаһы буйынса модернизацияланған 4-се лицейҙа булды. Уҡыу йорто ике корпуста урынлашҡан. Береһендә башланғыс, икенсеһендә 5-11-се кластар шөғөлләнә. Быйыл лицейға барлығы 1025 бала йөрөй. 1956 йылда төҙөлгән башланғыс мәктәп бинаһы былтыр белем биреү учреждениеларын капиталь ремонтлау федераль программаһы буйынса яңыртылған. Барлығы 56,9 миллион һумлыҡ эш башҡарылған. Тағы ла 6,2 миллион һум биләмәне, мәктәптең спорт майҙансығын төҙөкләндереүгә, ә 4,8 миллион һум уҡыу ҡорамалдары, йыһаздар алыуға йүнәлтелгән. Лицей директоры Фирүзә Ахунйәнова әйтеүенсә, корпуста ҡыйыҡ, фасад, түшәм-иҙәндәр ремонтланған, тәҙрә-ишектәр, һыу һәм йылытыу системаһы алмаштырылған. Башҡортостан Башлығы уҡыу кластарын, ашхананы, спорт залын ҡараны, шәмбе көнө түңәрәктәргә, спорт секцияларына йөрөгән башланғыс класс уҡыусылары менән аралашты. Педагогия коллективы республика етәкселегенә мәктәпте капиталь төҙөлөш буйынса федераль программаға индергән өсөн рәхмәтен белдерҙе. Бина яңыртылыуы һөҙөмтәһендә балаларҙың хәҙер бер сменала уҡыуҙары тураһында әйтте. Был турала Радий Хәбиров үҙенең сәхифәһендә лә яҙмаһы менән уртаҡлашты: - Бик матур килеп сыҡҡан. Хәҙер балалар заманса бинала уҡый. Ҡыйыҡ, фасад, эске биҙәлеш, коммуникация, хәүефһеҙлек өсөн яуап биргән системалар барыһы ла алмаштырылған. Яңы спорт майҙансығы барлыҡҡа килгән.Президент башланғысы менән булдырылған мәктәптәрҙе комплекслы капиталь ремонтлау буйынса программаны Башҡортостанда дауам итәбеҙ. Быйыл беҙ 77 бинала ремонт планлаштырабыҙ. Барыһы буйынса ла контракт төҙөлгән, эштәр башланған, - тиелә яҙмала. Фото: Башҡортостан Башлығы сәхифәһенән.