Беренсе каналда барған “Тауыш” тапшырыуының сираттағы 11-се миҙгелен бик ентекле ҡарап барабыҙ, сөнки унда сығыш яһаған яҡташтарыбыҙ моңло тауышы менән һоҡланыу уятыуын дауам итә. 12 майҙағы тапшырыуҙа Өфөнән Гөлнара Байғужина йырланы. 21 йәшлек ҡыҙ “осош”ҡа икенсе раундты үтә алды. Ул остаз Антон Беляевтың өс йырсыһы йырлаған төркөмдә заманса йырҙы – электрон “Cream Soda” төркөмөнөң “Башҡаса бер ниндәй ҙә кисәһеҙ” хитын – башҡарҙы. Ә яҡташыбыҙҙың көнәркәштәре Астемир Болов (итальян йыры “Con Te Partiro”) һәм Анастасия Капрельян (үткән быуаттың 60-сы йылдарындағы “Наҙлылыҡ” ) булды. Шуныһы үҙенсәлекле: Антон Беляев Гөлнара Байғужина тураһында: “Парадоксаль ҡарар. Гөлнара Байғужина йырлағанда күңелемә йылыраҡ”, - тип һоҡланыуын белдерҙе. Быға тиклем төркөмөбөҙҙәге яҙмаларҙың береһендә тапшырыуҙа Гөлнара әсәһенең матур йырлауы, атаһының баянда шәп уйнауы һәм тап уларҙың сәнғәт донъяһына һөйөү уятыуы, үҙенең филология факультетының VI курсында белем алыуы хаҡында һөйләүе тураһында хәбәр иткәйнек. Стәрлетамаҡта тыуып үҫкән, әле Мәскәүҙә йәшәгән Эльмира Диваева ла “Нокауттар”ҙың өсөнсө раундында сығыш яһаны. Уның остазы – Владимир Пресняков. Көнәркәштәре Маша Мэй (“Һин уны танырһың” йыры, “Корни” төркөмө) һәм Әхмәд Әхмәдов (“Ҡояш”, Елена Терлеева) булды. Һәм Стәрлетамаҡ ҡыҙы киләһе этапҡа үтте. Уның сығышы алҡышҡа күмелде. "Нимә эшләнең һин, Эльмира?" - тине Владимир Пресняков. Ә яҡташыбыҙҙың сығышы, ысынлап та, бик үҙенсәлекле, ҡабатланмаҫ һәм һоҡланғыс ине. Эльмира менән бер төркөмдә йырлағандарҙан Әхмәд Әхмәдовты Полина Гагарина “ҡотҡарҙы”, йәғни үҙ командаһына алды. Хөрмәтле дуҫтар, Беренсе каналдың “Тауыш” тапшырыуында ҡатнашҡан яҡташтарыбыҙға уңыштар теләйек. Фотолар: coolkarma.ru; vk.com/id11931197