Ак халатлы, ак күңелле

Әйе, күпләр өчен бу һөнәр балачак хыялы булса, Флизә Гыйльми кызы медицинага очраклы килеп керә һәм, аңа гашыйк булып, гомере буе яраткан эшен башкара. Шуңа дистә еллар дәвамында аны үзгәртү, үзен башка өлкәләрдә сынап кару теләге бөтенләй булмый.Таҗикстан якларында туып-үскән ул. Кыз 4-5 яшьләрдә булганда яшь гаилә әтисенең туган ягына – Кырмыскалы районының Олыкүл авылына күченеп кайта. Мәктәпне тәмамлау белән Флизә, әтисенең эзеннән китәргә карар итеп, Башкорт дәүләт авыл хуҗалыгы институтына юллана, аның кебек агроном булырга хыяллана. Ләкин конкурстан үтә алмый. Күрәсең, Ходай шулай эшкәрткәндер: ул үзен медицинага багышларга тиеш. Шулай итеп, документларын алып, якындагы медицина училищесына юллана һәм, имтиханнарны уңышлы тапшырып, укырга керә. Укыган чорда ук үз итә ул бу һөнәрне. Училищены тәмамлау белән Уфа шәһәре 6нчы дәваха­нәсенең функциональ диагностика бүлегендә хезмәт биографиясен башлап җибәрә.Күпмедер вакыттан кияүгә чыгып, гаиләсе белән Ульяновск якларында яшиләр. Анда да ул үз белгечлеге буенча Балалар йортында эшли. Аннан кайткач, хезмәт юлын район үзәк дәваханәсендә дәвам итә, озак кына шәфкать туташы булып эшли. Район үзәгендә яңа балалар бакчасы ачылгач, Флизә Насретдинованы шунда эшкә чакыралар. Алты ел эшләп, хаклы ялга китә ул аннан. Ләкин яраткан эшеннән башка булдыра алмый. Пенсиядә булса да, үзенең белгечлеге буенча эш эзли һәм язмышы аны янә район үзәк дәваханәсенә алып килә. Дистә елга якын табиблык комис­сиясендә шәфкать туташы булып эшли.Флизә Гыйльми кызы сүз­ләренчә, аның һәр эш көне үзенә күрә үзенчәлекле, ул төрлечә булырга мөмкин. Чөнки һәр көнне төрле диагноз куелган авырулар белән эшләргә туры килә, аларның кабинеты аша көн саен күпме авырулар үтә: инвалидлык юллау, “больничный” кәгазьләре, белеш­мәләр – барысы да шушында.— Истә калырлык эш көннәрем күп булды инде, тик күңелсез хәлләр турында сөйлисем килми. Ярдәм күрсәтә алмаган вакытларда йөрәктә яра кала, ул вакытлар онытылмый, – ди ул. – Ә менә кемгәдер ярдәм итә алсам, мин үземне бик бәхетле тоям!Флизә Гыйльми кызын хезмәт­тәшләре дә хөрмәт итә. Ә яшьләр өчен ул — остаз һәм киңәшче. Менә тиздән хаклы ялга җыенуын ишетеп, хезмәттәшләре тагын бераз булса да эшләргә күндерергә тырыша.— Флизә Гыйльми кызы белән эшләү бик җиңел. Нинди генә хәлләр килеп чыкса да, ул тыныч­лык саклый, – ди аның турында хезмәттәше Айсылу Сафиуллина. – Ул – үз эшенең остасы, һәр эшнең җаен табып эшли, һәрвакыт итагатьле, йөзендә елмаю балкый. Безне генә түгел, авыруларны да ул шулай ягымлы итеп каршылый, шуңа бу бүлмәдән барысы да яхшы кәеф белән чыга.Бу өлкәгә очраклы рәвештә генә килеп эләксә дә, шәфкать туташы һөнәрен сайлавына Флизә Насретдинова һич тә үкенми.— Мин гомерем буе яраткан эшемне башкардым. Шуның белән бик бәхетлемен. Һәм янымда һәрвакыт ярдәм итәргә әзер кешеләр булды. Фәнисә Исхакова, Фидая Сәрвәрт­динова — минем тәүге остазларым, мин аларга чиксез рәхмәтле. Шулай ук табиблар Земфира Ханнанова, Гүзәл Камалова, Алия Хафизова һәм башкалар белән озак еллар матур итеп эшләдек, — ди Флизә Гыйльми кызы, барлык хезмәт­тәшләренә рәхмәт­ләрен һәм изге теләкләрен җиткереп.Эльвира ЯМАЛЕТДИНОВА,“Кызыл таң”ның үз хәбәрчесе.Кырмыскалы районы.