Туризмды үҫтереүгә 335,5 миллион һум аҡса йүнәлтеләсәк

— Былтыр 1,9 миллион турист теркәлде. Был күрһәткес буйынса Башҡортостан Волга буйы федераль округында 3-сө, Рәсәйҙә 13-сө урынды биләй. Һандар насар түгел, әммә Башҡортостандың потенциалы күпкә юғарыраҡ. Волга буйы федераль округында беренсе урынға сығырлыҡ итеп артабан да эшләргә тейешбеҙ, ил тәү кимәлендәге күрһәткестә тәүге биш төбәк рәтенә инергә тейешбеҙ. Бының өсөн хеҙмәтләндереү кимәлен күтәрергә, инфраструктураны яҡшыртырға, республиканы йыл әйләнәһенә ял итеү өсөн төбәк итеп танытырға кәрәк, — тине Андрей Назаров. Министрҙар кабинеты етәксеһе билдәләүенсә, республика был йәһәттән федераль сығымдарҙы әүҙем йәлеп итеүен дауам итә. Былтыр Башҡортостан туризм өлкәһендәге сараларға федераль ярҙам күрһәтеү буйынса алдынғы төбәктәрҙең береһе булды. 700 миллион һумдан ашыу суммаға республика ғаризалары хупланған, шул иҫәптән туризм инфраструктураһын үҫтереүгә 335,5 миллион һум, Өфө үҙәгенең туристик кодын проектлау өсөн 208 миллион һум, мәктәп туризмын популярлаштырыу өсөн 188 миллион һум, Халыҡ-ара Өфө марафонына алты миллион һум самаһы аҡса бүленгән. Башҡортостандың Эшҡыуарлыҡ һәм туризм буйынса министры Рөстәм Афзалов үҙ сығышында юридик шәхестәргә һәм айырым эшҡыуарҙарға субсидия биреү иҫәбенә ярҙам күрһәтеү планлаштырыла, тип аңлатты. - Гранттар күләме 3 миллиондан алып 10 миллион һумға тиклем етәсәк, шул уҡ ваҡытта конкурста ҡатнашыусыларҙың үҙ аҡсаһы проект хаҡынан 50 проценттан да кәм булмаҫҡа тейеш. Пляждарҙы ойоштороу, туристик ҡорамалдар һатып алыу, шул иҫәптән туристик эшмәкәрлекте тәьмин итеү һәм мөмкинлектәре сикләнгәндәр өсөн уңайлыҡтар булдырыу буйынса проекттарға финанс ярҙам күрһәтеүҙе күҙҙә тотҡан резолюция проекты әҙерләнгән. Проект сиктәрендә ял итеү урындарында балаларға махсуслаштырылған һәм спорт мөйөштәре булдырыу, туҡланыу урындары, кемпингтар һәм автомобилдәр лагерҙары булдырыу, бассейндарҙы йыл әйләнәһенә файҙаланыуҙы ойоштороу, яңы туристик маршруттар эшләү, электрон белешмәләр булдырыу ҡаралған. Гранттарға ғаризалар конкурс нигеҙендә башҡарыласаҡ. Еңеүселәр мәрәй системаһы буйынса рейтинг нигеҙендә билдәләнә, - тип белдерҙе министр. Андрей Назаров тәҡдим ителгән вариантта Башҡортостан Республикаһы Хөкүмәтенең «Башҡортостан Республикаһының туристик индустрияһы субъекттарына субсидия рәүешендә гранттар биреү тураһында» ҡарарын ҡабул итергә кәрәклеген билдәләне, шулай уҡ 2023 йылдың декабренә тиклем бүленгән аҡсаны тулыһынса үҙләштереүҙе тәьмин итергә ҡушты. Фото һәм мәғлүмәт сығанағы Башҡортостан Хөкүмәте сайты.