Վաշինգտոնը կոչ է արել Հայաստանի և Ադրբեջանի ղեկավարներին՝ Նիկոլ Փաշինյանին և Իլհամ Ալիևին, համաձայնել զորքերը դուրս բերել սահմանից Սոթքի տարածքում։
«Այս տեսակի բռնությունը խաթարում է Հայաստանի և Ադրբեջանի առաջընթացը դեպի կայուն և արժանապատիվ խաղաղություն։ Մենք կոչ ենք անում երկու երկրների ղեկավարներին մայիսի 14-ին Բրյուսելում համաձայնել զինված ուժերի դուրսբերմանը սահմանից»,- ասել է ԱՄՆ պետքարտուղարության փոխխոսնակ Վեդանտ Պատելը։
Նա հավելել է, որ այս հարցը քննարկվել է մայիսի սկզբին ԱՄՆ պետքարտուղար Էնթոնի Բլինկենի մասնակցությամբ Վաշինգտոնում կայացած բանակցություններում։
Մայիսի 1-4-ը ԱՄՆ-ում բանակցություններ են տեղի ունեցել Հայաստանի և Ադրբեջանի արտգործնախարարների միջև։ Վաշինգտոնում նրանք հանդիպել են Բլինքենի, ինչպես նաև ԱՄՆ ազգային անվտանգության հարցերով խորհրդական Ջեյք Սալիվանի հետ։ Բանակցություններից հետո Հայաստանի ԱԳՆ-ն հայտարարեց, որ Երևանն ու Բաքուն առաջընթաց են գրանցել, սակայն որոշ հարցերի շուրջ կողմերի դիրքորոշումները դեռևս տարբերվում են։ Բլինկենն ընդգծել է, որ Երևանն ու Բաքուն «շոշափելի առաջընթաց» են գրանցել, և վերջնական համաձայնությունը «հասանելի է»:
Սակայն մայիսի 11-ին Հայաստանի և Ադրբեջանի սահմանին լարվածության նոր փուլ սկսվեց, երբ, ըստ ՀՀ ՊՆ տեղեկատվության, ադրբեջանական զինուժը սկսեց գնդակոծել Գեղարքունիքի մարզի Սոթք գյուղի մերձակայքում գտնվող հայկական դիրքերը: Հայաստանի պաշտպանության նախարարությունը հայտնել է, որ ժամը 10:25-ի դրությամբ Սոթքի մոտ վիրավորված հայ զինծառայողների թիվը հասել է չորսի, նրանց կյանքին վտանգ չի սպառնում։