Башҡортостан Хөкүмәтенән хәбәр итеүҙәренсә, 23-24 июндә Өфөлә Рәсәй һәм Беларусь йәштәре форумы була. Майҙансыҡ Рәсәй һәм Беларусь төбәктәренең Х юбилей форумы алдынан уҙғарыла һәм 18-35 йәшлек 500 йәш кешене берләштерә. Форумда халыҡ-ара йәштәр хеҙмәттәшлеге өлкәһендә үҙ эшмәкәрлеген тормошҡа ашырыусы студенттар, аспиранттар, йәш ғалимдар, белгестәр, профессионалдар ҡатнашасаҡ. Ике көн дауамында программа “йәштәр эшҡыуарлығы”, “патриотик тәрбиә биреү”, “йәш идарасылар” һәм “студент отрядтары слеты” йүнәлештәре буйынса үтәсәк. Форум Ағиҙел йылғаһы буйында Йәштәр көнөн байрам итеү менән тамамланасаҡ. – Рәсәй һәм Беларусь йәштәре форумы эшҡыуарлыҡ өлкәһендә артабан хеҙмәттәшлек итеүҙе, туристик маршруттарҙы, йәштәр берләшмәләрен, патриотик проекттар өлкәһендә берлектәге экспедицияларҙы үҫтереүҙе күҙ уңында тотоп, йәштәр өлкәһендә халыҡ-ара хеҙмәттәшлекте үҫтереүҙең яңы йүнәлеше буласаҡ. Форум программаһында йәштәр бизнес-берләшмәһен үҫтереүгә баҫым яһалған. Башҡортостан Йәштәр эштәре буйынса федераль агентлыҡтың Бөтә Рәсәй йәштәр эшҡыуарлығын үҫтереү буйынса программаһын тормошҡа ашырыуҙың пилот төбәктәре иҫәбенә инә, уның сиктәрендә республикала икенсе йыл “Йәшлек. Бизнес” проектын әҙерләнек һәм тормошҡа ашырабыҙ. Йәш эшҡыуарҙарыбыҙ үҙ тәжрибәһен күрһәтергә һәм уларҙы халыҡ-ара бизнес-проекттарға индерергә әҙер, – тине Йәштәр сәйәсәте буйынса дәүләт комитеты рәйесе Яна Гайдук. “Йәштәр эшҡыуарлығы” трегы заманса шарттарҙа тышҡы сауҙаны камиллаштырыу буйынса ҡарарҙар әҙерләү өсөн йәш эшҡыуарҙарҙы, иҡтисад өлкәһендәге белгестәрҙе берләштерәсәк. Трек остаздары – Рәсәй һәм Беларусь бизнес һәм сәнәғәт өлкәһендәге идарасылар һәм эксперттар. Эшҡыуарлыҡ йүнәлеше сиктәрендә ҙур предприятие вәкилдәре менән дискуссия майҙансығы, бөгөнгө ысынбарлыҡта илдәр араһында эшҡыуарлыҡты үҫтереү тураһында пленар ултырыш планлаштырыла. Тректа ҡатнашыусылар йәштәр эшҡыуарлығын үҫтереүгә, иҡтисад өлкәһендәге төп проекттарҙы тормошҡа ашырыуға йүнәлтелгән кейс-мәсьәләләрҙе хәл итәсәк. Берлектә тормошҡа ашырыу өсөн әҙерләнгән Рәсәй Федерацияһы төбәктәренең һәм Беларусь Республикаһының йәштәр бизнес-проекттары эш һөҙөмтәһе буласаҡ. Форум тураһындағы яңылыҡтарҙы "Бәйләнештә" социаль селтәрендә Башҡортостан Республикаһының Йәштәр сәйәсәте буйынса дәүләт комитеты берләшмәһендә күҙәтергә мөмкин: https://vk.com/molodez102 Фото һәм сығанаҡ: https://pravitelstvorb.ru/news/20907/