12 май – Бөтә донъя шәфҡәт туташтары көнө. Һеҙҙе һаулыҡ һаҡлауҙа алыштырғыһыҙ хеҙмәткәрҙәрҙең береһе Гөлназ Зөлҡәрнәй ҡыҙы Дәүләтшина менән таныштырмаҡсыбыҙ. Уңғанлығы, миһырбанлығы менән яҡташтарының хөрмәтен ҡаҙанған өлкән шәфҡәт туташы Туймазы үҙәк район дауаханаһының реанимация бүлексәһендә эшләй. Медицина хеҙмәткәре, ҡайҙа ғына булмаһын, һәр саҡ уяулыҡ, өлгөрлөк күрһәтә, кәрәк булғанда, мотлаҡ ярҙамға ашыға. Пандемия ваҡытында шәфҡәт туташына айырыуса ҙур көсөргәнеш менән эшләргә, ашығыс мәсьәләләрҙе оператив хәл итергә, ваҡыт менән иҫәпләшмәҫкә тура килә. ...Бер ваҡыт Өфөнән ҡайтып килгәндә пассажир автобусы юл-транспорт ваҡиғаһына юлыға. Бәрелешкәндән һуң, автобус юлдан ситкә оса. Гөлназ Дәүләтшина аңын юғалта. Иҫенә килеү менән, шәфҡәт туташы ашығыс ярҙам килгәнгә ҡәҙәр ҡалған 15 пассажирға медицина ярҙамы күрһәтә башлай. Водителдең башы йәрәхәтләнгән була. Аптечканы алып, яраны бәйләй, өйәнәк тотҡан иргә ярҙам күрһәтә. Гөлназ Зөлҡәрнәй ҡыҙы – 29 йыл хеҙмәт стажына эйә булған тәжрибәле шәфҡәт туташы. Башҡортостан Республикаһының Почет грамотаһы, Рәсәй Һаулыҡ һаҡлау министрлығының Почет грамотаһы менән наградланған. Ике ҡыҙы ла һөнәр алып, үҙаллы эшләп йөрөй. Беҙ уңған әсә һәм шәфҡәт туташы Гөлназ Дәүләтшинаны һөнәри байрамы менән ихлас ҡотлап, уға артабан да эшендә уңыштар, һаулыҡ теләйбеҙ. Фото: шәхси архивтан.