"Казанның 175нче гимназиясенә бер вәхши үтеп кереп, балаларга атканда Ислам анда була, барысын да үз күзләре белән күрә… Һәлак булган 7 укучы – Исламның сыйныфташлары", -дип яза "Интертат"."11 майны без улыбызның икенче туган көне дип саныйбыз, – дигән әлеге басмага әңгәмәсендә Алсу Сөнгатуллина. – 2021 елның 11 май вакыйгалары улыбызның да, безнең дә тормышыбызны баштанаяк үзгәртте. Май аена керү белән әлеге коточкыч хәлләрне тагын да ныграк хәтеребезгә төшерә башлыйбыз. Безнең тормыш шул көнгә кадәр һәм аннан соңга бүленде.Фаҗигадән соң, сыйныфыбыздагы балалар да, әти-әниләр дә башка кешеләргә әверелде. Улымның күзаллаулары, бу дөньяга карашлары, аны кабул итүе үзгәрде. Аның фикерләре дә фәлсәфи хәзер. Шул көннән соң Ислам 20 елга өлкәнәйде сыман. Кайвакыт ул миннән дә зуррак булып тоела. Яшәү, безнең бу дөньяга килүебез, тормыш мәгънәсе турында шундый сүзләр әйтеп куя ки, «чыннан да шулай бит» дип уйлана башлыйсың. Олы улыбызның фикерләүләрен исә махсус операция шулай үзгәртте. Күрәсең, безнең балалар шушы юлны узарга тиеш булгандыр… Мондый хәлләр без уйлансын, яшәүнең, бер-беребезнең кадерен белсен өчен биреләдер.Ислам бу вакыйгадан соң психологларга йөрмәде, чөнки бер кешегә дә ышанмады. Баштагы чорларда аңа бик кыен булды. Үз-үзе белән көрәште, дисәм инде. Нигә тормышта шундый хәлләр була? Нигә кемдер исән кала, кемдер яшьли вафат була? Әнә шул сорауларга җавап эзләде.Фаҗига корбаннары – улымның сыйныфташлары – һәрвакыт исебездә… Алар Исламның иң якын дуслары иде. 14 яшьлек балаларның ул көнне нәрсәләр күрүе һәм ниләр кичерүе хакында уйласаң да куркыныч булып китә… Улыма физик яралар белән беррәттән рухи яраларын да дәваларга туры килде. Ул булдырды, барысын да җиңеп чыга алды. Ләкин ул хәзер һәрвакыт фәлсәфи эзләнүдә. Кешелек кая барып җитте? Нигә кешеләр терактлар оештыра, ул кемгә, нәрсә өчен кирәк? Нигә кешеләр шундый кансызлыкка бара? Бу хакта бик күп китаплар да укыды.Без шушы яра белән яшибез. Яшәргә, алга барырга кирәк. Аллаһы Тәгалә минем улымны саклап калган икән, димәк, аның бу тормышта нинди дә булса миссиясе бар. Ул һәлак булган балалар хакына да яхшы гамәлләр кылырга тиеш", – дигән Алсу Сөнгатуллина. фото: ИнтертатБу хакта тулырак: https://intertat.tatar/news/175-gimnaziyadage-faigaga-ike-el-sul-konnan-son-ulym-20-elga-olkanaide-syman-5859170