11 майҙа Ырымбурҙа Рәсәй Президенты Хакимиәте етәксеһе урынбаҫары Магомедсалам Магомедов һәм Рәсәй Президентының Волга буйы федераль округындағы тулы хоҡуҡлы вәкиле Игорь Комаров рәйеслегендә Волга буйы федераль округы төбәктәре башлыҡтарының этноконфессиональ өлкә өсөн яуаплы урынбаҫарҙары менән семинар-кәңәшмә үтте. Ултырыш барышында округ төбәктәрендә 2025 йылға тиклемге Рәсәй Федерацияһының дәүләт милли сәйәсәте стратегияһын тормошҡа ашырыу мәсьәләләре һәм, яңы шарттарҙы иҫәпкә алып, этник-ара һәм конфессия-ара татыулыҡтың башҡа аспекттары тикшерелде. Кәңәшмә РФ Президенты Владимир Путин ҡушыуы буйынса йыл һайын Волга буйы федераль округы төбәктәренең береһендә үткәрелә. Семинар эшендә Милләттәр эштәре буйынса федераль агентлыҡ етәксеһе Игорь Баринов, РФ Дәүләт Думаһының Милләттәр эштәре буйынса комитеты рәйесе Геннадий Семигин, Ырымбур өлкәһе губернаторы Денис Паслер, РФ Президенты ҡарамағындағы Милләт-ара мөнәсәбәттәр буйынса совет ағзалары Владимир Зорин һәм Пётр Тултаев ҡатнашты. Башҡортостан Республикаһынан республика Башлығы Хакимиәте етәксеһе Максим Забелин ҡатнашты. Кәңәшмәне асып, Рәсәй Президентының Волга буйы федераль округындағы тулы хоҡуҡлы вәкиле Игорь Комаров: “Быйыл семинар Ырымбур өлкәһендә үткәрелә, унда Рәсәй халыҡтары мәҙәниәттәрен үҫтереү буйынса ярайһы ҙур тәжрибә бар. Төбәктә төрлө милләт вәкилдәре өсөн уңайлы шарттар булдырылған”, - тине. Тулы хоҡуҡлы вәкил, тышҡы баҫым шарттарында милләт-ара һәм конфессия-ара мөнәсәбәттәр өлкәһендә төбәк власть органдарының мөһим бурыстарының береһе - милли һәм дини нигеҙҙәге бәхәстәрҙе иҫкәртеү һәм бөтөрөү, тип һыҙыҡ өҫтөнә алды. Украинала махсус хәрби операция үткәреү дәүләт милли сәйәсәтенә туранан-тура ҡағылышы булған бер нисә бурысты көнүҙәк итте, тип билдәләне РФ Президенты Хакимиәте етәксеһе урынбаҫары Магомедсалам Магомедов. “Волга буйы федераль округы милләт-ара мөнәсәбәттәрҙең төп күрһәткестәре буйынса лидер булып тора: халыҡтың 90 проценты тиерлек уларҙы ыңғай тип иҫәпләй. Төбәктәрҙең именлеге – күп осраҡта 10 йылда ныҡлы нигеҙ һалырға мөмкинлек биргән ғәйәт ҙур эш һөҙөмтәһе. Тышҡы баҫым фонында Рәсәй халҡының тупланыуы артты ғына. Илебеҙ халҡының 80 проценттан ашыуы дәүләт Башлығының махсус хәрби операция үткәреү тураһындағы ҡарарын хуплай, шул иҫәптән беҙҙең милли ойошмалар һәм берләшмәләр”, – тине ул. Шулай уҡ фин-уғыр проблематикаһы, “Рәсәй халыҡтары ассамблеяһы” йәмәғәт-дәүләт ойошмаһын, “Рәсәй халыҡтары йорто” менән үҙ-ара эш итеүҙә төбәк үҙәктәре селтәрен үҫтереү тикшерелде. Кәңәшмәнән һуң, журналистарҙың һорауҙарына яуап биреп, Игорь Комаров, “Волга буйы федераль округы өсөн милләт-ара, конфессия-ара мәсьәләләр айырым әһәмиәткә эйә: 14 төбәктең алтыһы - милли республика. Беҙҙең ҙур ғаиләнең – Волга буйы федераль округы төбәктәренең этник, конфессия-ара составы – беҙҙе милләт-ара мөнәсәбәттәргә баҫым яһарға мәжбүр итә. Тышҡы баҫымға ҡарамаҫтан, беҙ Рәсәй Президенты сәйәсәте тирәләй берҙәмлекте, уның хәҙерге донъя ҡоролошо, махсус хәрби операция үткәреү мәсьәләһе буйынса позицияларын күрәбеҙ”. “Дөйөм Рәсәй гражданлыҡ берҙәйлеге кимәле кеүек мөһим күрһәткес Волга буйы федераль округында 94,4 процентҡа еткән, был ил буйынса уртаса күрһәткестән юғары. Халыҡтың дәүләт, халыҡ, йәмғиәт менән бәйләнешен аңлау факторы тикшеренеү тарихында иң юғары кимәлдә тора. Төбәк етәкселәренә ошо йүнәлештә етди эшләгәндәре өсөн рәхмәт белдерәм”, - тине журналистарға Милләттәр эштәре буйынса федераль агентлыҡ етәксеһе Игорь Баринов.