“Остаз” республика конкурсы башланды

Бөгөн Башҡортостан мәғарифты үҫтереү институтының Милли мәғариф буйынса ресурс үҙәгенең башланғысы менән “Остаз” республика конкурсына старт бирелде. Яңы бәйге Уҡытыусы һәм остаз йылына, республикала иғлан ителгән Атайсал өсөн изге ғәмәлдәр йылына арнала. Конкурс республика буйынса бер нисә зонала үткәреләсәк, артабан еңеүселәр 14 декабрҙә билдәләнгән Башҡорт теле көнөндә финалда осрашасаҡ. Бөгөнгө тәүге зона бәйгеһендә Өфө ҡалаһының ете районынан һәм ике гимназияһынан туғыҙ команда ҡатнашты. Команда составында директорҙар, башҡорт теле уҡытыусылары, методистар, тәрбиәселәр бар ине. Улар Өфө ҡалаһының Совет, Ленин, Калинин, Орджоникидзе, Октябрь, Киров, Дим райондарының, Өфө ҡалаһындағы 1-се һәм 2-се полилингваль гимназияларҙың данын яҡланы. - Был проект уҡытыусыларҙы туплау, уҡытыуҙың яңы методикалары менән таныштырыу, тәжрибә уртаҡлашыу кеүек изге маҡсаттарҙы күҙ уңында тотоп булдырылды. Конкурс тотош республика буйынса ете зонала үтәсәк. Ярыш барышында командалар үҙҙәре менән үҙенсәлекле итеп таныштырырға, уҡытыуҙың яңы алымдары, үҙҙәре ҡулланған заманса технологияларҙы күрһәтергә, милли мәғарифҡа, мәҙәниәт, әҙәбиәт өлкәләренә ҡағылышлы һорауҙарға яуап бирергә тейеш, - тип конкурс тураһында һөйләне Милли мәғариф буйынса ресурс үҙәге директоры Әлфиә Вәкил ҡыҙы Әбделмәнова. Командаларҙың сығышын жюри һәр сығыштан һуң асыҡ алымда баһаланы. Шулай итеп, Өфө ҡалаһының Дим районында асылған 2-се “СМАРТ” республика полилингваль күп профилле гимназияһы – беренсе, Дим районы мәктәптәре командаһы – икенсе, Киров районы уҡытыусылары өсөнсө урынды яуланы. Жюриҙың берҙәм ҡарарына ярашлы, “Остаз” конкурсының финалында беренсе һәм икенсе урындарҙы яулаған ике команда ҡатнашасаҡ. - Был конкурс Уҡытыусы һәм остаз йылында туған телебеҙҙе үҫтереүгә, уны киңерәк танытыуға булышлыҡ иткән иң матур сараларҙың береһе булыр, тип ышанам. Үҙҙәренең райондарында, мәктәптәрендә башҡорт телен уҡытыуға, өйрәтеүгә, һаҡлауға иҫ киткес ҙур өлөш индергән тел һаҡсылары – уҡытыусылар, методистар, тәрбиәселәр – барыһы ла еңеүсе, тип һанайым, - тине жюри ағзаһы, “Башҡортостан уҡытыусыһы” журналының баш мөхәррире Салауат Ғайса улы Кәримов. Айрат Нурмөхәмәтов фотолары.