13 майҙа Дәүләкәндә Башҡортостан Башлығы Радий Хәбиров Архангел, Дәүләкән, Иглин, Ҡырмыҫҡалы, Өфө, Шишмә райондарының ауыл биләмәләре башлыҡтары менән сираттағы төбәк кәңәшмәһен үткәрҙе. Көн тәртибендә биләмә үҫешенең көнүҙәк социаль-иҡтисади мәсьәләләре тикшерелде. Шулай уҡ унда министрлыҡ һәм ведомстволар, район һәм ҡала хакимиәттәре башлыҡтары ҡатнашты. Кәңәшмә башланыр алдынан төбәк етәксеһе Дәүләкән районы предприятиеларының продукцияһы күгәҙмәһе менән танышты. Муниципалитет башлығы Илгиз Мөхәмәтйәнов районда урындағы башланғыстарҙы хуплау программаһында әүҙем ҡатнашыуҙарын белдерҙе. Ете йыл эсендә 98 миллион һумлыҡ 95 проект тормошҡа ашырылған. Программа арҡаһында төрлө коммуналь техника һатып алынған, социаль-мәҙәни объекттар төҙөкләндерелгән, юлдар ремонтланған. Радий Хәбиров шулай уҡ ике еңел сәнәғәт предприятиелары продукцияһы – Дәүләкән аяҡ кейемдәре фабрикаһы һәм “Сандра” компанияһы менән танышты. Улар балалар аяҡ кейемдәрен етештерә. Предприятие етәкселәре продукцияның Рәсәйҙә һәм Бойондороҡһоҙ дәүләттәр берләшмәһендә һорау менән ҡулланылыуын билдәләне. Семинарҙағы сығышында төбәк етәксеһе алдағы йылдарҙа урындағы үҙидара органдарының көнүҙәк эш бурыстарын билдәләне. - Эшегеҙҙе ни тиклем сифатлы итеп башҡарыуығыҙға республикабыҙҙың уңышлы үҫеше бәйле, - тине Радий Хәбиров. – Беҙгә илдең бөгөнгө тарихының иң ҡатмарлы осоронда хеҙмәт итергә тура килә. Беҙ бергәләп коронавирус менән көрәштек, сит ил санкцияларына ла бирешмәбеҙ, бөгөн Тыуған илде һаҡлаған егеттәргә лә ярҙам итәбеҙ. Эшегеҙ өсөн рәхмәт һеҙгә! Төбәк Башлығы республикабыҙ иҡтисадының ябай булмаған шарттарҙа тотороҡло үҫеүен билдәләне: - Төбәккә инвестициялар килеүе мөһим. Берҙәм тырышлыҡ менән Башҡортостан яңы проекттар тормошҡа ашырыу өсөн ҡыҙыҡтыра. Беҙҙә эшҡыуарҙарға дәүләт ярҙамы саралары ла күп, - тип өҫтәне Радий Хәбиров. – Бынан тыш беҙ тораҡ пункттарҙы тәртипкә килтереү буйынса ҙур аҙым эшләнек. Ихаталарҙы һәм подъездарҙы, урамдарҙы ремонтлауға, йәмәғәт киңлектәрен яңыртыуға ла иғтибар йүнәлтергә тырышабыҙ. Үҙенең сығышының аҙағында төбәк Башлығы урында етәкселәргә яугирҙәргә, уларҙың яҡындарына, туғандарына ярҙам итеү өсөн барлыҡ көстө һалыу мөһимлеген әйтте. Был эште ойоштороу өсөн республикала махсус хәрби операцияла ҡатнашыусыларға һәм уларҙың ғаиләләренә ярҙам үҙәктәре эшләй. Фото: Башҡортостан Башлығы сайты.