Վարչապետ Նիկոլ Փաշինյանի որոշմամբ՝ Սարգիս Հովհաննիսյանը նշանակվել է ՊՊԾ պետի պաշտոնում: Այս մասին նշված է վարչապետի՝ ապրիլի 28-ի որոշման մեջ։
«Ղեկավարվելով «Հատուկ պետական պաշտպանության ենթակա անձինք անվտանգության ապահովման մասին» Հայաստանի Հանրապետության օրենքը 15.1-ին հոդվածի 2-րդ մասով՝ Սարգիս Հովհաննիսյանին նշանակել Հայաստանի Հանրապետության պետական պահպանության ծառայության պետ»,- ասված է որոշման մեջ։
Հիշեցնենք, որ Նիկոլ Փաշինյանը մարտի 29-ին որոշում էր ստորագրել, որով հաստատվել էր Պետական պահպանության ծառայության կանոնադրությունն ու կառուցվածքը։ Ըստ նոր կանոնադրության՝ Ծառայության կառավարումն իրականացնում է վարչապետը, Ծառայության պետը հաշվետու է վարչապետին։ Ծառայության անմիջական ղեկավարումն իրականացնում է ծառայության պետը:
2022 թվականի կառավարության նոյեմբերի 24-ի նիստի չզեկուցվող հարցով Պետական պահպանության ծառայությունն առանձնացվել էր Ազգային անվտանգության ծառայությունից։