Түбә бик тиз ремонтланган

Республика халкының “Инцидент-менеджмент” һәм “Дәүләт хезмәтләре. Бергәләп хәл итәбез” кире элемтә платформасы мәгълүмат системаларында теркәлгән мөрәҗәгатьләре саны кими. Бер атна эчендә алар 4053 булган, бу, узган атнадагыга караганда, 1080гә кимрәк.Мөрәҗәгатьләрнең күпче­леге төзекләндерү (1021) темасына кагыла, әмма узган атна белән чагыштырганда, аларның саны да 111гә азрак. Халык территорияләрне җыеш­тыру, җәмәгать киңлек­ләрен төзекләндерү буенча сораулар бирә, яшел үсен­теләрнең торышы белән кызыксына. Төзек­ләндерү темасына иң күп хәбәр Уфа, Стәрлетамак шә­һәрләреннән, Благовещен районыннан килгән. Юллар мөрәҗәгатьләр саны буенча икенче урында. Әлеге темага да зарланучылар саны кими. Бу аңлашыла да: юлларда ремонт бара, димәк, халыкның канәгать­сезлек градусы да төшә, ә бул­ган кимчелекләрне рес­публиканың Транспорт һәм юл хуҗалыгы министрлыгы хәл итеп килә. Мөрәҗәгатьләр саны буенча өченче урында — торак-коммуналь хуҗалык. Менә шуларның берничәсе. Уфа­ның Урман техникумы урамындагы 14нче йорт түбә­сенең сырт тактасы кубарылуы һәм теләсә кайсы вакытта аның килеп төшәргә мөмкин булуы турында шәһәрдә яшәүчеләрнең берсе социаль челтәрләрдә язган. Мәгълү­матны “Инцидент-менеджмент” сис­темасы тоткан, соң­рак Октябрь районы хакимияте эшкә алган. Шул ук көнне түбәне ремонтлау кирәк­леге турында мәгълүмат идарәче компаниягә тапшырылган. Аның хезмәткәрләренә проблеманы чишү өчен берничә сәгать таләп ителгән. Шушы урамның күрше 16нчы йортында яшәүчеләр дә үзләрен борчыган проблема турында “Дәүләт хезмәт­ләре. Бергәләп хәл итәбез” кире элемтә платформасы аша белдергән. Озак вакыт халыкны подвалдан яман ис килүе борчыган. Октябрь районы хакимияте мөрәҗәгатьне идарәче компаниягә тапшырган. “ЖЭУ” хезмәткәрләре иснең сәбәбен тиз тапкан: баксаң, канализация торба­сының тоташкан урынында ярык хасил булган икән. Слесарьлар, прокладканы алыштырып, агынты суларны туктаткан һәм подвалны эшкәрткән. 29 мартта Бөредә Коммунистик һәм Киров урамнары киселешендә юл-транспорт һәлакәте була: автомобиль светофорга бәрелә. Аны төзәтү мөмкин булмый, шул сәбәпле, җайланманы сүтә­ләр. Светофор урнаштыру турында социаль челтәрләрдә берничә үтенеч пәйда булган, һәм аларны Башкортстанның ЦУР системалары теркәгән. Юл-транспорт һәлакәтенә сәбәп­челәрне табып, административ җаваплылыкка тарттырганнар. Авариядә гаеплеләр яңа светофорны үз исәбенә сатып алган. 13 апрельдә аны урнаштырганнар. Хәзер юл чатында хәрә­кәт штат режимында көйләнә. Уфаның Красин урамындагы 19нчы йортта электр энергиясе өзелүгә халык социаль челтәрләрдә зар­ланган. 15 апрельдә, шимбә көнне, алар утсыз калган һәм өйдә ризык әзерләү мөмкинлеге булмаган, чөнки йортта электр плитәләре урнаштырылган. Уфаның Ленин районы хакимияте проблеманы хәл итүгә оператив рәвештә кушылган. Ачыклануынча, күрше Красин урамындагы 21нче йорт янында кабель зарарланган булган. Кабель линияләре этаплап тергезелгән, шуңа күрә вакыт күбрәк таләп ителгән. Шул ук көнне 22:35 сәгатьтә электр белән тәэмин итүне тулысынча көйләгәннәр, бу хакта гражданнарны яклау идарәсе хәбәр иткән. Туймазыда Ленин проспекты, 1нче йорттагы матур балалар мәйданчыгын хулиганнар, теләсә нинди сүзләр язып, бозган, ямьсезләгән. Ваемсыз булмаган бер хатын бу хакта социаль челтәрләрдә язган, аның хәбәрен Республикага идарә итү үзәгенең системалары тотканнан соң, Туймазы районы хакимияте таләбе белән идарәче компания хезмәткәре тикшерү үткәргән. Берничә көннән соң балалар мәйданчыгының уен җиһаз­ларындагы язуларны махсус чара белән юганнар. Октябрьский шәһәренең 40нчы микрорайонында кыш ахырында тавышны изоля­цияләү экраны элементы очып төшкән. Биредә яшәүчеләр җимерек­лекләрне алып ташлауны һәм конструкцияне тергезүне сораган. Республикага идарә итү үзәге командасы Октябрьский шәһәре хакимия­тендәге коллегалары белән бергә мәсьәләне контрольгә алган. Тавыш киртәсенең килеп төшкән өлешен шунда ук алып ташлаганнар, ә экранның җитешмәгән секциясен соңрак урнаштырганнар. Халык бик канәгать калган.