Башҡортостанда май байрамдарында урманға ял итергә сығырға ярамай

Башҡортостанда янғын хәүефе юғары булыу сәбәпле, 30 апрелдән 15 майға тиклем урмандарға йөрөүгә һәм автотранспортҡа инеү сикләнә. Башҡортостандың Урман хужалығы министрлығында аңлатыуҙарынса, синоптиктар фаразы буйынса байрам көндәрендә ғәҙәттән тыш йылы һәм елле буласаҡ. Өҫтәүенә, ғәҙәттән тыш ведомстволар аналитикаһына ярашлы, яҙғы янғындарҙың сәбәбе һәр ваҡыт кеше була. – Әгәр 13 урман янғынын ҡараһаҡ, һигеҙ осраҡта был үлән яндырылған ауыл хужалығы ерҙәренән күсеүе сәбәпсе, ҡалған осраҡтарҙа – ут менән һаҡһыҙ эш итеү. Әлегә ҙур урман янғындарына юл ҡуйылмаған, әммә башҡа категориялы ерҙәрҙә бик күп яныу нөктәләрен теркәп барабыҙ. Бына ошо көндәрҙә “М5” трассаһында үлән яна — күрәһең, машина тәҙрәһенә тәмәке төтөнө ырғытҡандар, һәм был да ҙур бәләгә килтереүе ихтимал, — тип аңлатма бирҙе Башҡортостандың урман хужалығы министры Марат Шәрәфетдинов. "Әлбиттә, майҙың ял көндәрендә урманға, тәбиғәткә шашлыҡҡа сығырға теләй, әммә быйыл, ҡыҙғанысҡа ҡаршы, был килеп сыҡмаясаҡ. Урмандарҙа янғындарға юл ҡуймау өсөн барыһы 800-ҙән ашыу патруль төркөмө эшләйәсәк, уларға Ғәҙәттән тыш хәлдәр министрлығы, Урман хужалығы министрлығы, Ғәҙәттән тыш хәлдәр дәүләт комитеты, муниципалитет хеҙмәткәрҙәре инә. Шулай уҡ хәлде Эске эштәр министрлығы һәм ЮХХДИ хеҙмәткәрҙәре күҙәтәсәк», – тип хәбәр итте ведомство етәксеһе. Былтыр урман янғындары өсөн штрафтар һиҙелерлек артты, тип иҫкәртәләр Урман хужалығы министрлығында. Физик шәхестәргә – 60 мең һумға тиклем, юридик шәхестәргә ике миллион һумға тиклем административ штраф һалына. “Өҫтәүенә, әгәр ауыл хужалығы предприятиеларының йәки крәҫтиән-фермер хужалығының ғәйебе иҫбатланһа, улар дәүләт ярҙамынан мәхрүм ителәсәк. Бәләкәй фермер хужалығы өсөн бындай штраф һәм субсидияларҙан баш тартыу уның эшен туҡтатырға мөмкин. Шуға күрә аграрийҙарҙы бик һаҡ булырға һәм ҡоро үлән, баҫыуҙарҙағы сүп-сарҙы яндырыуҙы бөтөнләй туҡтатырға саҡырам”, – тип белдерҙе Марат Шәрәфетдинов. Бер үк ваҡытта ауылдарҙы урман янғындарынан һаҡларға кәрәк. “Бөтәһе лә Свердловск өлкәһендә, күршеләрҙә, булған фажиғә тураһында белә. Иҫкәртеү саралары янғын һүндереүгә ҡарағанда күпкә осһоҙға төш. Ғәҙәттән тыш хәлдәр министрлығы иҫәпләүҙәре буйынса, 184 тораҡ пунктта 1 майға тиклем янғынға ҡаршы һыҙат һөрөргә тейеш. Был эш өсөн муниципалитет башлыҡтары яуаплы. Былтыр ул ваҡытында эшләнгәйне”, – тине министр. Фото: mchsrb