Ապրիլի 18-ին ՀՀ վարչապետ Նիկոլ Փաշինյանն Ազգային ժողովում հայտարարեց, որ Հայաստանը պատրաստ է ճանաչել Ադրբեջանի տարածքային ամբողջականությունն ու խաղաղության պայմանագիր կնքել Ադրբեջանի հետ, բայց Բաքուն չի ընդունում հայկական կողմի այս փաստաթղթի նախագիծը:
Armenia Today-ը քաղաքացիներին խնդրել է գնահատել Փաշինյանի հայտարարությունը՝ Ադրբեջանի տարածքային ամբողջականությունն ընդունելու և այդ պայմաններով Բաքվի հետ խաղաղության պայմանագիր կնքելու պատրաստակամության մասին:
Հարցված քաղաքացիների մեծամասնությունը այդ հայտարարությունը բացասական է գնահատում և պնդում, որ համերաշխությունը, խաղաղությունը հեշտ չեն տրվում և Արցախը երբեք չի կարող լինել Ադրբեջանի կազմում:
«Կարելի է ճանաչել ամբողջականությունը, եթե Արցախը չի մտնում Ադրբեջանի մեջ: Արցախը երբեք չի եղել ու չի լինի Ադրբեջանի կազմի մեջ: Ես Արցախից եմ, իմ ծնողներն արցախցի են, ես վստահ եմ, որ Արցախը երբեք չի լինի Ադրբեջանի կազմում»,- նշեց քաղաքացիներից մեկը:
Մել այլ քաղաքացի ընդգծեց, որ Ադրբեջանի հետ չենք կարող բարեկամություն անել. «Ադրբեջանի հետ չպետք է բարեկամություն անենք, նա մեր թշնամին է և վերջ, բանակցելով իրավիճակ չենք փոխի, պետք է պայքարենք: Պետք է իմանանք, որ ուղղությամբ գնանք և գտնենք մեր իսկական բարեկամին»:
«Այն ազգը, այն պետությունը, որը սպանում է մեր որդիներին, չի կարող մեր հետ համերաշխության դաշինք կնքել, խաղաղության պայմանագիր հնարավոր է, եթե Թուրքիան ճանաչի ցեղասպանությունը, եթե Ադրբեջանը վերադառնա իր տարածք, եթե Արցախը վերջապես ստանա անկախություն»,- նկատեց հարցվածներից մեկ այլ քաղաքացի:
Քաղաքացիներից մեկն էլ կողմ էր այդ պայմանագրի կնքմանը, եթե անգամ Արցախը լինի Ադրբեջանի կազմում. «Ճիշտ եմ համարում, ինչքան կարելի է թշնամանքը շարունակել, իրար չհասկանալ, պետք է ի վերջո հաշտություն ձեռք բերել: Տարիներ շարունակ Ադրբեջանում ապրել են արցախցիներ հաշտ-համերաշխ իրար հետ, մենք էլ այստեղ ենք թուրքերի հետ հաշտ ապրել, հերիք է անընդհատ փնովեն»,- ասաց նա:
Մանրամասները՝ տեսանյութում: