Йәштәр юриспруденция менән ҡыҙыҡһына

26 апрелдә БР Дәүләт Йыйылышы – Ҡоролтайҙа “Дәүләт Думаһы моделе” фәнни-ғәмәли эшлекле уйынына йомғаҡ яһалды. Йола буйынса, конкурс 27 апрелдә билдәләнгән Рәсәй парламентаризмы көнөнә ҡарата ойошторола. Конкурстың маҡсаты – әүҙем гражданлыҡ позицияһын булдырыу, дискуссия ярыштары уҙғарыу ярҙамында ҡатнашыусыларҙа ораторлыҡ, эшлекле һәм ижади оҫталыҡты үҫтереү. Бәйгеселәрҙе компетентлы жюри баһаланы: Дәүләт Думаһының Дәүләт төҙөлөшө һәм ҡануниәт буйынса комитеты рәйесенең беренсе урынбаҫары, Рәсәй Юристар ассоциацияһының Башҡортостан бүлексәһе рәйесе Ирина Панькина; БР Дәүләт Йыйылышы – Ҡоролтай рәйесе урынбаҫары Рөстәм Ишмөхәмәтов; ӨФһТУ-ның Хоҡуҡ институты директоры Руслан Зәйнуллин һәм Рәсәй Юристар ассоциацияһының Башҡортостан бүлексәһе советы ағзаһы Надежда Крылова. Конкурста Өфө фән һәм технологиялар университетының Хоҡуҡ институты, Өфө фән һәм технологиялар университетының Стәрлетамаҡ филиалы һәм РФ Хөкүмәте ҡарамағындағы Финанс университетының Өфө филиалы студенттары ҡатнашты. Улар төрлө көнүҙәк йүнәлештәр буйынса закондар сығарыу башланғыстары проекттары әҙерләгән һәм сығыш яһаған: мәғлүмәт сәйәсәте, мәғлүмәт технологиялары һәм элемтә, мәғариф һәм фән, граждандар йәмғиәтен үҫтереү, социаль сәйәсәт. “Дәүләт Думаһы моделе” үҙенең киләсәген юриспруденция менән бәйләргә теләгән йәштәрҙе берләштерә. Студенттарҙың закондар сығарыу процесы менән ҡыҙыҡһыныуын күреү үтә ҡыуаныслы. Улар үҙенсәлекле, аналитик һәләттәрен һәм лидерлыҡ ҡеүәтен, шулай уҡ командала эшләй һәм ҡатмарлы мәсьәләләрҙе хәл итә белеүҙәрен күрһәтте. Конкурсыбыҙ – үҙ һәләтеңде күрһәтеү һәм асыу өсөн шәп мөмкинлек, тип ышанам”,– тине Ирина Панькина. Сығыш яһау йомғаҡтары буйынса, ӨФһТУ-ның Хоҡуҡ институты студенттарының “Ғәҙел закон сығарыусылар” командаһы еңде. Икенсе урынды Рәсәй Хөкүмәте ҡарамағындағы Финанс университетының Өфө филиалы колледжының 1-2-се курс студенттары командаһы яуланы. Өсөнсө урында – ӨФһТУ-ның Хоҡуҡ институтының “Хоҡуҡи машина” командаһы.