Бөгөн Башҡортостандың Александр Доставалов исемендәге ирекле батальоны ир-егеттәре ике аҙналыҡ ялдан һуң ҡабаттан махсус хәрби операция биләмәһенә юлланды. Башҡортостан Республикаһынан хәрби хеҙмәткәрҙәр менән үҙ-ара эш итеү мәсьәләһе буйынса Башҡортостан Башлығы кәңәшсеһе Алик Камалетдинов та һалдаттарҙы оҙатыу сараһында ҡатнашты. – Бөгөн беҙ ялдан һуң сираттағы хәрбиҙәр төркөмөн оҙатабыҙ. Ошо уҡ автобус менән тағы бер төркөм ял итергә ҡайтасаҡ. Ирекле батальондарҙы ғына түгел, мобилизацияланғандарҙы ҡаршылау ҙа иғтибар үҙәгендә. Рәсәй Президенты Владимир Путин, махсус хәрби операция биләмәһендә 180 тәүлек булған хәрбиҙәрҙең ял итергә тейешлеге тураһында иғлан иткәндән һуң, был йүнәлештә эште ғинуар айынан алып барабыҙ. Ошо маҡсатта Башҡортостан Башлығы Радий Хәбиров автобустар менән ярҙам итә. Хәрбиҙәр уңайлы транспортта ҡайта һәм ҡабат юллана. Шуны билдәләргә кәрәк: беҙҙең егеттәр батырҙарса хеҙмәт итә. Улар тураһында тик ыңғай һүҙҙәр ишетәбеҙ. Беҙҙең теләк бер: тиҙерәк еңеү яулап, иҫән-имен тыуған яҡтарына ҡайтһындар, – тине ул. Алыҫ райондан килгән “Сельсовет” позывнойлы яугирҙе лә ҡәҙерле кешеләре уратҡан сағында тап иттек. – Бик һағынып ҡайтҡайным. Тыуған районымда ла матур итеп йыр-бейеүҙәр менән ҡаршы алдылар, хөрмәт күрһәттеләр. Ғаиләм, туғандарым, дуҫтарым менән ике аҙна ваҡыт һиҙелмәй ҙә үтеп китте. Хәҙер ҡабат хәрби хеҙмәткә китергә ваҡыт етте. Маҡсат – еңеп, тыуған яҡҡа ҡайтырға, – тине яугир. “Зима” позывнойлы егет тә ялының файҙалы үтеүен белдерҙе: – Ял итеп, һаулыҡты нығытып алдым. Бөгөн мине ҡатыным менән улым оҙатырға килде. Күңелдә – хәрби рух, – тине ул. Егеттәрҙең етди бурыс үтәргә юлланғанын яҡындары аңлай. Шуға ла уларға ҡарата барыһының да бер теләк: “Күңелдәрен төшөрмәһендәр, иҫән-һау ҡайтһындар!” Махсус хәрби-операцияға юлланған ир-егеттәрҙе йәнтөйәге, яҡындары көтөп ҡала. Ошо изге хистәр уларға ауырлыҡтарҙы еңергә рухи көс өҫтәһен. Автор фотолары.