Шагыйрьнең туганнары, килгән кунаклар мемориаль тактаташ янына чәчәкләр салды, музей-кабинеты белән танышты. Аннан соң чара Мәдәният сараенда дәвам итте. Монда шагыйрьнең кызы Гөлшат Рамазанова әтисенең иҗатын саклаганнары, хөрмәт күрсәткәннәре өчен оештыручыларга рәхмәт сүзләре җиткерде. Әлеге тантаналы чара "Мәдәният" гомумдәүләт проекты кысаларында үтте.Рамазан Байтимеров Авыргазы районы Исмәгыйль авылында 1923 елның 5 апрелендә гаиләдә бишенче бала булып дөньяга килгән. Изге рамазан аенда туганга, аңа "Рамазан" дип исем кушканнар.Авылда - җидееллык, Сәмәркандта урта мәктәп тәмамлагач, Ташкентта укытучылар курсында белем ала. Тик һөнәре буенча эшли алмый, чөнки Бөек Ватан сугышы башлана. Рамазан Байтимеров Гвардия һава десанты бригадасы сафларында Балтыйк буе илләрен, Чехословакия, Венгрияне азат итүдә катнаша. Яралана, ике тапкыр контузия ала. Батырлыгы өчен медальләр, орден белән бүләкләнә.Сугыштан соң, инвалид булып калуына карамастан, җиң сызганып эшкә тотына. Казан дәүләт университетын читтән торып тәмамлап, иҗат белән шөгыльләнә. Беренче шигырьләре "Кызыл таң", "Чаян", "Социалистик Татарстан" басмаларында дөнья күрә. Күрше Кырмыскалы районы кызы, укытучы Мөнәвәрә белән гаилә корып, Гөлнур белән Гөлшат исемле кызлар үстерәләр.1958 елда гаилә Татарстанның беренче нефтьчеләр шәһәре Лениногорскига күчеп китә. Рамазан Муллагали улы иҗатка чумып, "Чишмә" әдәби берләшмәсендә актив катнаша, "Заветы Ильича" гәзитендә, радио һәм телевидениедә эшли. Бу елларда ул бик күп шигырьләр, поэмалар, драма әсәрләре яза. Аның иҗатында Бөек Ватан сугышы, туган як, нефтьчеләр, гади хезмәт кешеләре язмышы урын алган. Бер-бер артлы "Туган як" (Казан, 1982), "Җырларым-солдатларым" (Казан,1983), "Канатларым" (Казан, 1886), "Мәңгелек яшьлек " (Бөгелмә, 1988) китаплары нәшер ителә. Аның шигырьләренә Рөстәм Яхин, Сара Садыйкова, Әнвәр Бакиров һәм башка күренекле композиторлар көй иҗат иткән. "Ялгыз Бану", "Укытучы", "Сәлимәкәй" кебек әсәрләре бүгенге көндә дә театр сәхнәләрендә куелып тора.Рамазан Байтимеровның "Туган ягым" шигыренә Рөстәм Яхин иҗат иткән җыр Татарстан Республикасы гимнының нигезен тәшкил итә. Бөтенрусия күләмендә үткәрелгән бәйгедә аның "Туган як" шигыре җиңүче дип билгеләнә. Бу шигырь ТАССРның 50 еллыгына багышлап язылган була. Әлеге бәйгегә шигырь текстын кызы Гөлшат тапшыра , чөнки автор бу вакытка үзе инде бакыйлыкка күчкән була. 2013 елның 28 мартында гимн беренче тапкыр яңгырый.Бу тарихи вакыйгадан соң, аның иҗатына кызыксыну тагын да арта. Ике шигырьләр җыентыгы бастырыла, яшәгән йорт бинасына мемориал тактаташ куела.Фото: Башинформ