Салауат районының Татар Малаяҙы ауылында матур ғаилә, абруйлы хеҙмәт ветерандары – Фәнүзә һәм Миңлейән Насибуллиндар ғүмер итә. Ғаилә башлығының хеҙмәт юлы колхозда үтһә, уның ҡатыны уҡытыусы булып эшләгән. Ауылыбыҙҙың хөрмәтле аҡһаҡалы Миңлейән Фәйзулла улы тыуып үҫкән еренә һәр саҡ тоғро ҡалды. Борондан ата-бабалары йәшәгән Салауат районынан ҡайҙалыр күсеп китеү тураһында уйы ла булманы. Уның бөтә уңыштары, шатлыҡтары һәм хәсрәттәре Татар Малаяҙы менән бәйле. Миңлейән Насибуллин 1936 йылдың йәйендә тыуған. Ете класты тамамлап, Дыуан районының Ярославка ауылында һөнәрселек-техник училищеһында уҡый. Һуңынан инде 30 йылға яҡын бер урында – “Урал” колхозында механизатор булып эшләй. Ул ғүмер буйы тракторсы булды һәм эшен бик яратып башҡарҙы, һәр ваҡыт уны беренсе урынға ҡуйҙы. “Эшем менән ғорурланам”, – ти ул хеҙмәт дәүере хаҡында. Яҡшы эш күрһәткестәре өсөн уның хеҙмәт кенәгәһендә тик рәхмәт һүҙҙәре генә яҙылған. 1994 йылда уға “Башҡортостан Республикаһының атҡаҙанған ауыл хужалығы хеҙмәткәре” тигән маҡтаулы исем бирелде. Миңлейән Насибуллин матур йырлай ҙа, ауылда унһыҙ бер концерт та үтмәй торғайны. Үҙ ваҡытында уны Салауат районы “һандуғасы” тип йөрөттөләр. Фәнүзә Абзал ҡыҙы ла – тыуып үҫкән еренең ысын илһөйәре. Ул 1941 йылдың 25 декабрендә Салауат районының Миәшәгәр ауылында донъяға килгән. Алты бала араһында төпсөгө була. Ауылдағы урта мәктәпте уңышлы тамамлауына ҡарамаҫтан, хеҙмәт юлын һарыҡ фермаһында башлай. Бының сәбәбе лә бар: ул замандарҙа ауыл ерендә тейешле ике йылыңды эшләмәй тороп, ҡулға паспорт бирмәгәндәр. Аҙаҡ йәш ҡыҙ Силәбе өлкәһенең Һатҡы ҡалаһындағы кирбес заводына эшкә урынлаша. Әлбиттә, Фәнүзәнең Магнитогорск тау институтына уҡырға инергә мөмкинлеге лә була, әммә ул уҡытыусы һөнәрен һайлай. Ауылда фермала эшләгән мәлдә лә Х класлы белемле ҡыҙға декрет ялына киткән уҡытыусыны алмаштырырға тура килә. Был изге һәм хөрмәтле һөнәрҙе ошо тәжрибәһенән сығып һайларға ҡарар иткәндер ҙә инде. Ул 1962 йылда Белорет педагогия училищеһына уҡырға инә. Белгестәр етмәгәнлектән, уҡыу ваҡытын ҡыҫҡартып, Фәнүзә Абзал ҡыҙын Мәсетле районына рус теле һәм әҙәбиәтенән белем бирергә ебәрәләр. 1964 йылда тыуған районына ҡайтып, дүрт йыл Гусевка башланғыс мәктәбендә эшләй. Шул ваҡытта Татар Малаяҙы егете Миңлейән Насибуллинды осратып, уның менән яҙмышын бәйләй. Фәнүзә Абзал ҡыҙы 1968 йылдан уҡытыуын Малаяҙ һигеҙ йыллыҡ мәктәбендә дауам итә. Өс тиҫтә йыл шунда эшләп, хаҡлы ялға сыға. – Ағас мәктәп ине, үҙебеҙ утын әҙерләп, мейес яға торғайныҡ. Коллектив татыу, берҙәм, ярҙамсыл булды. Кластар берләштерелеп уҡытылды. Тап ошо осор балаларына үҙаллылыҡ хас ине, күптәре юғары уҡыу йорттарында белем алды, – тип хәтирәләрен уртаҡлаша педагогик хеҙмәт ветераны. – Элек уҡытыусыға балаларға белем биреү генә түгел, бик күп йәмәғәт эштәре – матбуғат баҫмаларына яҙҙырыу, һәр ихатанан һөт йыйыу яуаплылығы ла йөкмәтелде, эштән һуң яланда комбайнсыларға концерт та ҡуя торғайныҡ... Абруйлы уҡытыусы үҙе лә – әүҙем йәмәғәтсе, етәксе. Биш саҡырылыш депутат, ике саҡырылыш халыҡ суды заседателе булып һайланды. Фиҙакәр һәм намыҫлы хеҙмәте өсөн КПСС-тың Үҙәк комитеты, СССР-ҙың Министрҙар Советы, Башҡортостандың Халыҡ мәғарифы министрлығының Почет грамоталары менән бүләкләнде. Ә иң ҙур баһа – әлбиттә, үҙе уҡытҡан уҡыусыларының рәхмәте, ауылдаштарының хөрмәте. 1998 йылдан бирле ул хаҡлы ялда. Насибуллиндар ике бала тәрбиәләп үҫтереп, уларҙы үҙаллы тормош юлына сығарҙы. Ҡыҙҙары Индира – опека бүлеге белгесе, ғаиләһе менән Учалы районында йәшәй, ә улдары Фәнил – Салауат районының газ хеҙмәтендә. Бөгөн Миңлейән Фәйзулла улы менән Фәнүзә Абзал ҡыҙы дүрт ейән-ейәнсәр шатлығын кисереп, бәхетле ҡартлыҡта ғүмер итә. Беҙ уларға ныҡлы һаулыҡ, оҙон ғүмер, бәхетле һәм имен тормош теләйбеҙ. Светлана ИШМӨХӘМӘТОВА Салауат районы.