«Քաղաքացիական պայմանագիր» խմբակցության պատգամավորը հայտարարել է, որ Հայաստանի անվտանգային համակարգը ոչ միայն Հայաստանը, այլ նաև Արցախն է։
Բաքվի կողմից անցակետի տեղադրումը Լաչինի միջանցքում
Անդրադառնալով Ադրբեջանի կողմից Լաչինի միջանցքում անցակետ տեղադրելու փաստին ու հայկական կողմի անելիքներին՝ նա նշել է․ «Անցակետ տեղադրելը գտնվում է կոնկրետ մեր ռազմավարական գործնկերոջ պատասխանատվության գոտում։ 2020-ի նոյեմբերի 9-ին ստանձնած պարտավորությունները պետք է կատարի»։
Դիտարկմանը՝ այս պարագայում ինչ պետք է անի Հայաստանը, նա արձագանքել է․ «Դուք Հայաստանի գործողությունների ամբողջ ծավալն այս ճեպազրույցի ժամանակ չեք կարող ստանալ»։
Ինչ վերաբերում է Արցախի շրջափակմանը՝ նա նշել է, որ բլոկադաները նաև երկար են տևում․ «Երբ դիմադրում ես, հաղթում ես»։
Խաղաղության պայմանագիր Հայաստանի և Ադրբեջանի միջև
Խոսելով խաղաղության պայմանագրի շուրջ առաջարկների վերաբերյալ կողմերի միջև առկա գործընթացից՝ նա նշել է, որ նամակագրությունը ընթացքի մեջ է։
«Ճոճանակի պես շարժվում է աջ, ձախ։ Ինչ կետի կգա, կախված է նրանից, թե մենք մեր երկրի ներսում որքան ամուր ենք կանգնած։ Մեր անվտանգային համակարգը միայն Հայաստանը չէ, նաև Արցախն է»,- ընդգծել է պատգամավորը։
Սահմանային անվտանգություն
Անդրադառնալով լրագրողի դիտարկմանը՝ թշնամին կրակում է նաև Գեղարքունիքի ուղղությամբ, ինչի հետևանքով զոհ ունենք, Քոչարյանը նշել է․ «Մենք էլ ենք կրակում։ Այն, ինչ որ մերն է, մերն է։ Առաջ, պատերազմից հետո, իրենք կրակում էին՝ մենք չէինք կրակում, իրենք գալիս էին՝ մենք լքում էինք տեղերը, բայց եթե իրենք կրակում են, մենք էլ ենք կրակում, եթե առաջ ավելի շատ զոհ էինք տալիս, հիմա այդպես չէ։ Եկեք կառուցողական լինենք մեր բանակի շուրջ»։
Ապրիլի 23-ին՝ ժամը 11:50-ի սահմաններում, Սոթքի հատվածում տեղակայված հայկական դիրքում, հրազենային մահացու վիրավորում էր ստացել ՀՀ ՊՆ N զորամասի զինծառայող Արտյոմ Արսենի Պողոսյանը:
Արցախի տեղեկատվական շտաբն ապրիլի 23-ին հայտնել էր, որ ադրբեջանական կողմը փակել է Հայաստանի և Արցախի սահմանին՝ Լաչինի միջանցքում, ՌԴ խաղաղապահների պատասխանատվության գոտում գտնվող Հակարի կամուրջը: Ավելի ուշ Ադրբեջանը հայտարարել էր Լաչինի միջանցքի մուտքի մոտ անցակետ տեղադրելու մասին։
Հիշեցնենք, որ դեկտեմբերի 12-ին մի խումբ ադրբեջանցիներ` «բնապահպանական» պատճառաբանություններով ժամը 10:30-ից փակել են Ստեփանակերտ-Գորիս մայրուղու Շուշի-Քարին տակ հատվածը՝ ոտնահարելով քաղաքացիական բնակչության կենսական շահերն ու իրավունքները: Այսօրվա դրությամբ ճանապարհը շարունակում է փակ մնալ: Արցախի ԱԽ նիստում որոշում է կայացվել դիմել ՌԴ Արցախի Հանրապետությունում տեղակայված ՌԴ խաղաղապահ զորակազմի հրամանատարությանը՝ անընդունելի համարելով միջանցքի փակումը: