Стәрлетамаҡта аутизм менән сирләгән балаларҙы дауалау үҙәге эшләп килә. Үҙәк туғыҙ грант, шул иҫәптән республика Башлығы гранты ярҙамында проекттарын тормошҡа ашыра. Ике йыл элек Стәрлетамаҡ ҡалаһынан Светлана Котлярова, үҙенең улын дауалау өсөн тейешле кимәлдә шарттар таба алмағас, был шарттарҙы үҙе булдырырға тотона. Бер юлы аутизм менән сирләгән башҡа балаларға ла ярҙам итергә ҡарар итә. “Аныҡ аҡыл балҡышы” үҙәге 2021 йылдан эшләп килә. Светлана үҙе бина таба, ҡорамал һатып ала, хеҙмәткәрҙәрҙе уҡыта. Бөгөн үҙәктә 13 белгес эшләй, шул иҫәптән психологтар, дефектологтар, физик культура буйынса белгес, нейропсихологтар һәм арт-терапевтар. Бында шулай уҡ коррекцион белем биреү усаҡтары вәкилдәре өсөн төрлө уҡытыу-семинарҙар ҙа ойошторола. Бөгөнгә 140 бала абилитация үткән, 35 бала былтыр йәйге ял лагерында һаулығын нығытҡан. Әйткәндәй, 2022 йылда үҙәктә “Ҡулда – ҡул” исемле проект барлыҡҡа килгән. Проект буйынса көршәк эшләү оҫтаханаһы эшләй башлаған. Проект республиканың Гранттар фонды ярҙамында барлыҡҡа килгән. Оҫтаханала балалар балсыҡтан, ағастан (көйҙөрөп) әйберҙәр яһай. Ошондай ысул менән Светлана ханым тыуған яғына ярҙам итә. Әйткәндәй, үҙәк хаҡында Башҡортостан Башлығы Радий Хәбиров та үҙ фекерен белдерҙе: “Светлана Котляроваға һәм уның коллегаларына уңыштар теләйем. Изге эш башҡараһығыҙ!” – тине Радий Фәрит улы. Рәмил МАНСУРОВ