Үҙәктә бер кемде лә ярҙамһыҙ ҡалдырмайҙар

Алдан хәбәр итеүебеҙсә, февраль айынан алып Стәрлетамаҡта Башҡортостанда ғына түгел, илдә(!) иң тәүге булып махсус хәрби операцияла ҡатнашыусыларға һәм уларҙың ғаиләләренә ярҙам итеү үҙәге асылды. Уны булдырыу хаҡында уҙған йыл аҙағында ҡаланың предприятие директорҙары советында ҡарар ҡабул ителгәйне. Ҡала башлығы Рөстәм Ғәзизов һәм Башҡортостан сода компанияһы генераль директоры Эдуард Давыдов башланғысы менән булдырылған үҙәккә бөгөн аҙнаһына уртаса 80-дән ашыу мөрәжәғәт килә. Үҙәк рәйесе Евгения Долгих белдереүенсә, кемдер ярҙам һорап килһә, бәғзеләр, киреһенсә, үҙе булышлыҡ итергә теләй. – Яугирҙәргә һәм уларҙың ғаилә­ләренә юридик, психологик һәм хатта физик ярҙам күрһәтелә. Кемдер, әйтәйек, күсемһеҙ милек рәсмиләштереү буйынса ҡыйынлыҡ кисергән, икенсеһе төрлө ведомстволарға мөрәжәғәттә булышлыҡ итеүҙе үтенә, ә кемдер килеп, күңелен бушатып ҡайтып китергә лә мохтаж – бер кем дә иғтибарҙан ситтә ҡалмай. Аҙнаһына уртаса 30-ҙан ашыу ошондай характерҙағы ярҙам күрһәтелә, шул ҡәҙәр йәки күберәк тә ярҙам итергә теләгән кешеләр ҙә килә, – тип бүлешә етәксе үҙәктәге эш тураһында. Үҙәкте булдырыу шуныһы менән дә отошло: ул “берҙәм тәҙрә” системаһында эшләй йәки бөтә мөһим мәғлүмәт ошонда туплана, яугирҙәр йәки уларҙың ғаиләләре ошонда мөрәжәғәт итә. Алғы һыҙыҡҡа гуманитар ярҙам ебәреү өсөн ниндәй аҙыҡ-түлек, әйбер, дарыу кәрәк, улар ҡасан, ҡайҙа туплана, яралан­ғандар, отпуск ялына ҡайтҡандар ҡайҙа һаулығын нығыта ала, түләүҙәрҙе юллау өсөн ҡайҙа барырға, ғаиләләр ниндәй льготаға эйә, уларға ниндәй ярҙам кәрәк – бында барыһын да белергә була. Шул уҡ ваҡытта мобилизацияланған яугирҙәр хеҙмәт иткән подразделениелар командирҙары менән дә бәйләнеш булдырылған. Ғөмүмән, көнүҙәк мәғ­лүмәт артынан был үҙәккә мөрәжәғәт итеү зарур. – Үҙәк эшләй башлағандан алып бөгөнгәсә урындағы власть органдары, предприятиелар вәкилдәре ҡатнаш­лығында өс тапҡыр мобилизациялан­ғандар менән, дүрт тапҡыр уларҙың яҡындары менән осрашыу ойошторҙоҡ. Биш кескәй гуманитар ылау оҙатылды. Был эште атҡарыуҙа булышлыҡ иткән өсөн Башҡортостан Башлығы кәңәшсеһе Алик Камалетдинов, урындағы “Набат” хәрби бәрелештәр союзы етәксеһе Илдус Манапов, ҡала советы депутаты Игорь Пылаевҡа ҙур рәхмәт. Шулай уҡ предприятие етәкселәре лә мөрәжә­ғәттәрҙе яуапһыҙ, ярҙамһыҙ ҡалдырмай, – тип тә өҫтәй Евгения Долгих. Әйткәндәй, Стәрлетамаҡта эшләп килгән үҙәк махсус хәрби операцияла ҡатнашыусыларға һәм уларҙың ғаиләләренә ярҙам итеү буйынса ҙур тәжрибә булып тора. Республика Башлығы Радий Хәбиров әлегеләй үҙәктәрҙе башҡа ҡала-райондарҙа ла булдырырға тигән күрһәтмә бирҙе яңыраҡ. Ошондай үҙәк Мәскәүҙә Стәрлетамаҡтан һуң бер аҙна үткәс асылһа, Санкт-Петербургтан һәм Приморьенан үткән аҙнала тәжрибә уртаҡлашыуҙы үтенеп шылтыратҡандар. Ғөмүмән, бындай мөрәжәғәттәр аҙнаһына бер нисә тапҡыр булып тора икән. Шылтыратыу тигәндән, ярҙам һорап йәки ярҙам тәҡдим итеп Стәрлетамаҡтан ғына мөрәжәғәт итмәйҙәр, шулай уҡ Башҡортостандың башҡа ҡалаларынан да йыш ҡына бәйләнешкә сығып торалар, ти Евгения Александровна. ...Бөгөн халҡыбыҙға берҙәм булыу, бер төптән йәшәү мөһим. Ошо берҙәм система булараҡ хеҙмәт иткән үҙәк эште лә берҙәм, маҡсатҡа ярашлы һәм тиҙ рәүештә алып барырға булышлыҡ итә. Рәмил МАНСУРОВ