Айгөл троллейбус йөрөтә

Ҡатын-ҡыҙҙар араһында троллейбус водителе булып эшләгән гүзәл заттар йыш осрай. Уларҙың береһе – “Стәрлетамаҡ троллейбус идаралығы” муниципаль унитар предприятиеһында эшләгән Айгөл Хисмәтуллина. Ул ерҙе файҙаланыу буйынса белгескә уҡыһа ла, күңеленә икенсе эш ята. Осраҡлы ғына эләгә был өлкәгә, әммә ошо һөнәргә бар йөрәктән ғашиҡ булып өлгөрә. – Ике йыл кондуктор булып эшләнем, аҙаҡтан троллейбус йөрөтөү нескәлектәренә өйрәттеләр. Уҡыу ваҡытында троллейбусты йөрөтөү ныҡ оҡшап ҡалды, – ти Айгөл Хисмәтуллина. Нимәһе ҡыҙыҡ: троллейбус руленә ултырғансы, ул бер ниндәй ҙә транспорт сараһына идара итмәгән. – Троллейбусты ғына йөрөтә алам, еңел машинаға танытмам да юҡ хатта. Мин тәүге тапҡыр рейсҡа тәжрибәле остаз менән сыҡтым. Тәүҙә, әлбиттә, әҙерәк ҡурҡа инем, әммә инструктор: “Һинән яҡшы водитель сығасаҡ!” – тине. Шунан башлап, үҙ-үҙемә ышаныс тыуҙы, әкренләп бөтә нәмәгә өйрәндем. Хәҙер мин ҡалала 6, 13, 14, 17-се троллейбустарҙы йөрөтәм, был эштә минең стаж – биш йыл. “Тимер ат”ымдың габариттарына инде өйрәнеп тә бөттөм, ниндәйҙер кимәлдә үҙ-үҙеңә ышаныс уята ул, сөнки троллейбус менән сағыштырғанда, ҡалған автомобилдәр бәләкәс кенә кеүек күренәләр, – ти шаяртыу ҡатыш әңгәмәсем. Айгөл Рифат ҡыҙы әйтеүенсә, уға таң һыҙылып атып килгәндә эшкә йөрөүе оҡшай икән. – Кешеләрҙең иң татлы таңғы йоҡоһо мәлендә ҡаланың буш урамдарынан елдереүе оҡшай. Әле тәбиғәт тә уянып бөтмәгән, ә мин инде күптән рулдә ултырған булам! “Яратҡан маршруттарың бармы?” тигән һорауға, ВТС-тан сығып, Гоголь урамынан Хоҙайбирҙин урамына барған 17-се маршрут буйлап йөрөү күңелгә ята, тине ул. – Башҡа маршруттарҙа ололар йыш йөрөй. Шуға күрә уларға күберәк иғтибар талап ителә. Оло йәштәгеләргә алғы ишектән инергә кәрәк, беҙ уны һәр саҡ асабыҙ. Әгәр ҙә троллейбусҡа өлгөрә алмай атлағандарын күрһәм, һәр ваҡыт көтөп торам, – ти тәжрибәле водитель. Айгөл, троллейбус йөрөтөүселәр бер-береһенә һәр саҡ ярҙам итергә әҙер, ти, хатта уларҙың үҙҙәре генә аңлап һөйләшә торған “тел”дәре лә бар икән! Әгәр ҙә юлда китеп барғанда ҡаршыһына осраған икенсе троллейбусҡа водитель рулгә йоҙроғон һуғып күрһәтһә, был уның төшкө ашҡа китеп барғанын аңлата. Ә инде ике йоҙроҡто бер-береһенә төйөп күрһәтһә, тимәк, юлда ниндәйҙер авария булған. – Миңә халыҡ өсөн, хеҙмәтемдең файҙаһын тойоп эшләү оҡшай. Йәмәғәт транспортын башҡа машиналар ихтирам итһен ине, сөнки халыҡтың күпселек өлөшөн беҙ йөрөтәбеҙ, улар өсөн яуаплылыҡ ғәйәт ҙур. Төп бурыс – кешеләрҙе күңелһеҙ хәлдәргә тарытмай ғына тейешле урынға тиклем алып барып еткереү, – ти ул үҙе лә. Һөнәреңә тоғролоҡ, миһырбанлыҡ һәм һәр саҡ күтәренке кәйеф – тап Айгөлгә генә хас сифаттар. Уға һәм бөтә рулдәге гүзәл заттарға тигеҙ юлдар теләп ҡалабыҙ! Рәмил МАНСУРОВ