Китапты илай-илай уҡыйҙар

Рәсми мәғлүмәттәргә таянғанда, Стәрлетамаҡта туҡһандан ашыу милләт вәкиле йәшәй. Ошо тиклем ялан сәскәләре һымаҡ төрлө-төрлө милләттәр берҙәм булып, низағтарға, ситтән килгән төрлө ҡотҡо-ҡотортоуҙарға бирешмәй, бирелмәй йәшәп килә. Уйлай китһәк, милли институттар үҫешендә был үҙе үк ҙур ҡаҙаныш! Шуныһы һөйөнөслө: ошо дуҫлыҡ төрлө саралар аша ла (бәлки, ептәрҙе нығытыуҙа төп нигеҙҙер ҙә әле) үрелә бара. Билдәле, беҙ бер-беребеҙҙе төрлө мәҙәни саралар, милли ризыҡ, кейем аша танырға өйрәнәбеҙ. Ә бына ҡалабыҙҙа баш­ҡорт ҡоролтайы был дуҫлыҡты фәнни юл аша ла нығытып ебәрҙе. Күптән түгел “Беҙ бергә: Стәрле­тамаҡ ҡалаһы халҡы байрамдары һәм йолалары” китабының исем туйы уҙҙы. Әммә китап шәжәрә юллау, байрам күренеше тураһында (ғына) бәйән итмәй, ә башҡорт, урыҫ, сыуаш, белорус һәм башҡа милләттәрҙең йәшәү рәүеше, тарихы, милли үҙенсәлектәре, ҡиммәт­тәре, асылы хаҡында ла һөйләй. Уларҙы һәр милләт вәкиле үҙе иғтибарға тәҡдим итә. Әйткәндәй, был китап Мәҙәни башланғыстарҙы яҡлау президент фонды гранты ярҙамында донъя күрҙе. Хәтерегеҙгә төшөрәбеҙ: уҙған йыл аҙағында төрлө милләт вәкилдәре йолаларын күрһәтеү буйынса этнофестиваль уҙғайны. – Был китапҡа 30-ҙан ашыу мәҡәлә инде. Ул мәҡәләләрҙә күп милләтле булған ҡалабыҙҙың, республикабыҙҙың, илебеҙҙең тарихы һәм берҙәмлеге сағыла. Ошо китап нигеҙендә беҙ төрлө мил­ләттән булған халыҡты тағы ла нығыраҡ дуҫлаштырырға, бер-береһенә хөрмәт хисен көсәйтергә тигән маҡсат ҡуйғайныҡ һәм был, беҙҙеңсә, килеп сыҡты: авторҙар ҙа, китап уҡыусылар ҙа ошо мә­ҡәләләр аша бер-береһенә тартыла, – тип һөйләп үтте китаптың исем туйында тарих фәндәре кандидаты, урындағы ҡоролтай рәйесе, проект­тың авторы һәм башҡарыусыһы Ләйсән Йосопова. Ысынлап та, ҙур эш эшләнгән һәм тағы бер иғтибарға лайыҡ күренеше бар уның: китап шул иҫәптән бөгөн Стәрлетамаҡта йәшәгән Луганск һәм Донецк халыҡ республикаларынан мәжбүри күсеп килеүселәргә лә бүләккә таратылды. Был йәһәттән әле сара барышында уҡ малай-ҡыҙҙарҙың китапты бирелеп уҡыуҙары, сығыш яһау­сыларҙы йотлоғоп тыңлауҙары, ә инде аҙаҡ күсеп килгән апайҙарҙың күҙ йәштәрен һөртә-һөртә рәхмәт әйтеүҙәре үҙе бер тулҡын­лан­дырғыс мәл булып уйылды күңелдә. Китапты уҡый-уҡый махсус хәрби операция маҡсатына, хәрби бәре­лештәр яу яланында ла, аңда­рыбыҙҙа ла барғанына төшөнәһең, ысынында кемдең кем икәнлеген аңлайһың. Сөнки имәндең планшет менән өйләнешеү йолаһы тураһында ла, донъяла бер нисә милләт вәкиле башҡаларҙан өҫтөн булыуы тураһында ла түгел был китап, ә башта әйткәнсә, төрлө-төрлө милләт-сәскәләрҙең бер яланда матур бер гөлләмә булып үҫеүе хаҡында. Рәмил МАНСУРОВ