Ռուսաստանի պաշտպանության նախարարությունը հայտարարել է, որ Լաչինի միջանցքով երթևեկությունը փակվել է Բաքվի միակողմանի և չհամաձայնեցված գործողությունների արդյունքում, խաղաղապահների հրամանատարությունը բանակցություններ է վարում ադրբեջանական կողմի հետ:
«2023 թվականի ապրիլի 23 - ին, միակողմանի և չհամաձայնեցված գործողությունների արդյունքում, ադրբեջանական կողմը փակել է երթևեկությունը Լաչինի միջանցքով ռուսական խաղաղապահ զորակազմի թիվ 1 դիտակետի տարածքում (Հակարի գետի վրայով անցնող կամուրջ)», - ասվում է գերատեսչության ապրիլի 24-ի տեղեկատվական տեղեկագրում։
Նշվում է, որ խաղաղապահ զորախմբի հրամանատարությունը բանակցություններ է վարում ադրբեջանական կողմի հետ:
Պաշտպանական գերատեսչությունը հայտնել է նաև Լեռնային Ղարաբաղում հրադադարի ռեժիմի խախտման մասին: «Հրադադարի ռեժիմի խախտում է արձանագրվել Մարտակերտի շրջանում։ Տուժածներ չկան։ Ռուսական խաղաղապահ զորակազմի հրամանատարությունն այս փաստի առնչությամբ քննություն է անցկացնում», - հայտնել է ՌԴ ՊՆ-ն։
Արցախի տեղեկատվական շտաբը ապրիլի 23-ին հայտնել է, որ ադրբեջանական կողմը փակել է Հայաստանի և Արցախի սահմանին՝ Լաչինի միջանցքում, ՌԴ խաղաղապահների պատասխանատվության գոտում գտնվող Հակարի կամուրջը: Ավելի ուշ Ադրբեջանը հայտարարեց Լաչինի միջանցքի մուտքի մոտ անցակետ տեղադրելու մասին։