Өлкәннәр Белоруссиягә сәяхәткә китте

22-23 апрельдә Мәскәүдә Башкорт­станның Русия Президенты каршындагы Тулы вәкаләтле вәкиллеге мәйданчы­гында “Якташ” яшьләр мәгариф форумы узды. Республика Башлыгы Радий Хәбиров кичә үткән оператив киңәшмәдә форумның әһәмиятен һәм башкала вузларында белем алучы студентлар белән зур эш алып барылуын ассызыклады.— Мәскәү, Санкт-Петербург югары уку йортларында укучы балалар белән эзмә-эзлекле эш алып барабыз, — диде Радий Хәбиров. — Югыйсә, безнең иң яхшы чыгарылыш укучылары башкалага китә һәм элемтәләр өзелә. Чынлыкта, алар — Башкортстанның киләчәге, һәм безнең бурыч даими элемтәләр, коммуникацияләр булдыру аша аларга уку барышында ярдәм итү. Алар, әлбәттә, барысы да — актив егетләр, ләкин аларга да безнең ярдәм кирәк. Бу — бик мөһим эш, аның белән җитди шөгыльләнү мөһим. Төбәк Башлыгы Хөкүмәт графигына эш сәфәрләренең берсенә вице-премьерларның студентлар белән очрашуын кертергә, тармак бурычларын билгеләргә кушты. Дәүләт җыелышына сайлауларга кадәр студентлар белән очрашуны Хөкүмәт әгъзалары үткәрәчәк, ә сайлаулардан соң бу эш депутатларга йөкләнәчәк. Республикада коронавирус инфекциясе белән авыручылар санының бераз үсеше күзәтелә. Узган җиде көндә Башкортстанда 892 кешенең диагнозы расланган, бу, узган атнадагыга караганда, 5 процентка күбрәк, дип хәбәр итте сәламәтлек саклау министры вазыйфасын башкаручы Азат Рәхмәтуллин. Пандемия башланганнан бирле COVID-19 барлыгы 363,5 мең кешедә ачыкланган. Табибларның мобиль бригадалары 24-28 апрельдә Иглин, Бөре, Авыргазы, Дуван, Бүздәк һәм Белорет районнарында пациентларны кабул итәчәк. Узган атнада республикада 137 гектардан артык мәйданда коры үлән януның 164 очрагы теркәлде, дип хәбәр итте Гадәттән тыш хәлләр буенча дәүләт комитеты рәисе Фәрит Гомәров. Моннан тыш, дүрт урман янгыны теркәлгән. Янгын чыганаклары Баймак, Благовар, Чишмә һәм Учалы районнарында табылган. Ут колачлаган җирләрнең гомум мәйданы 9 гектардан артык тәшкил итә.Башкортстанда язгы кыр эшләре актив фазага керде. Әйтик, 45 районның аграрийлары язгы культуралар чәчүгә керешкән, бүгенгә алар 11 процент мәйданда, ә майлы культуралар 27 мең гектарда, яки планның 6,7 процентында чәчелгән. Сигез район шикәр чөгендере чәчүгә керешкән. Бу хакта премьер-министр урынбасары, авыл хуҗалыгы министры Илшат Фазрахманов хәбәр итте. Ул белдерүенчә, агымдагы елда 2 миллион 170 мең гектардан артык мәйданга чәчү планлаштырыла. Башкортстан хуҗалыклары бөртекле, кузаклы һәм ярма культуралары орлыклары белән тулысынча тәэмин ителгән. Чәчүгә 285 мең тонна (планга карата 101 процент) үз орлыклары хәзерләнгән. Моннан тыш, республика хуҗалыкларында тракторлар, туфрак эшкәртү һәм чәчү машиналарын әзерләү тәмамланган. Тракторларның 78 проценты техник тикшерү үткән һәм басуга чыккан. Республика аграрийлары техниканы яңартуны дәвам итә. Агымдагы елның өч аенда 2 миллиард сумлык 595 берәмлек техника сатып алынган. Кичә кич республикадан пенсионерларның беренче төркеме “Башкортстан-Белоруссия озын гомерлелеге” программасы буенча Беларуська очты. Төркемгә төбәкнең 46 өлкән кешесе кергән, алар өчен Белоруссиядә 8 көн дәвамында бай мәдәни программа әзерләнгән. Эшкуарлык һәм туризм министры Рөстәм Афзалов мәгълүматлары буенча, программа буенча әлеге республикага барлыгы 1333 кеше барачак. Гомумән, “Башкортстанда озын гомерлелек” программасы кысаларында барлыгы 20 мең пенсионер сәяхәт итәчәк. Өстәвенә, маршрутлар саны, былтыргы белән чагыштырганда, ике тапкыр арткан. Киңәшмәдә, шулай ук, махсус хәрби операциядә катнашучыларның гаиләләренә ярдәм итү, Баймакта балалар поликлиникасы төзелешен тәмамлау турында фикер алыштылар. Вице-премьер, сәнәгать, энергетика һәм инновацияләр министры Александр Шельдяев республиканың сәнәгать туризмы буенча II Бөтенрусия акселераторында катнашуы турында чыгыш ясады.