Рәсәйҙә иң яҡшыһы тип танылды

Башҡортостан Стратегик башланғыстар агентлығы ойошторған II Бөтә Рәсәй сәнәғәт туризмы буйынса акселератор еңеүсеһе тип танылды. Был турала Хөкүмәттәге оператив кәңәшмәлә вице-премьер – сәнәғәт, энергетика һәм инновациялар министры Александр Шельдяев һөйләне. Республика “ПРОМдвижение” номинацияһында сәнәғәт туризмын алға этәреү стратегияһы буйынса иң яҡшы төбәк булып сыҡҡан. Барлығы конкурста 39 төбәктән 258 предприятие ҡатнашҡан. Улар араһында Башҡортостандан һигеҙ компания бар – улар үҙҙәренең производстволарына экскурсиялар ойоштора. Былар - “Өфө” һәм “Промцентр” индустриаль парктары, “Ағиҙел” халыҡ кәсептәре предприятиеһы, “ПОЛИЭФ”, “Благовещен икмәге” һәм “Благовещен арматур заводы”, Өфө яны ТЭЦ-ы һәм Павловка ГЭС-ы. Акселератор үҙ эсенә өс белем биреү модулен индергән, туристик продукцияһын әҙерләү буйынса менторҙар менән эш ҡаралған. Финал этабында Башҡортостан Башлығы Радий Хәбиров ҡушыуы буйынса эшләнгән Башҡортостандың сәнәғәт туризмын үҫтереү стратегияһын яҡлау булған. – Сәнәғәт туризмы республика предприятиеларының уңышы тураһында һөйләргә, инвестиция ылыҡтырғыслығын һәм брендтарҙың танылыуын күтәрергә, потенциаль хеҙмәткәрҙәр өсөн һөнәри ориентация эшенә булышлыҡ итергә ярҙам итә, – тине Александр Шельдяев. – Бынан тыш республика 2022 йылдан алып “Туризм һәм ҡунаҡсыллыҡ индустрияһы” милли проектының “Мәктәп туризмы” федераль программаһын тормошҡа ашырыу буйынса пилот төбәктәр иҫәбенә инә. Дөйөм алғанда, беҙ алдағы биш йылда сәнәғәт предприятиеларына туристар ағымын йылына 10 мең кешегә тиклем еткерергә ниәтләйбеҙ. Вице-премьер белдереүенсә, республиканың 20 предприятиеһы әленән экскурсиялар үткәрә, 2025 йылда уларҙың һанын ике тапҡыр арттырырға планлаштырыла. Александр Шельдяев турҙарҙы мебель кластерына, “Алға” иҡтисади зонаһына ойошторорға тәҡдим итте. – Сарала ҡатнашыусыларҙы ҡотлайым. Республиканы һәйбәт күрһәткәнһегеҙ, лайыҡлы урын алғанһығыҙ. Файҙалы эш, айырыуса беҙҙең балалар өсөн, – тине Радий Хәбиров. Фото: Башҡортостан Башлығы сайты.