Еңеү байрамына әҙерлек башланды

Быйыл 9 майҙа Өфөлә хәрби техника ҡатнашлығында парад буласаҡ. Был турала бөгөн Хөкүмәттең аҙналыҡ кәңәшмәһендә Башҡортостан Башлығы Радий Хәбиров белдерҙе. Ул хакимиәт башлыҡтарына халыҡҡа мәғлүмәтте еткерергә ҡушты. ”Хәрби парад була, уны ҡарарға балалар ҙа киләсәк. Уҡыу подразделениелары күнекмәләре планлаштырылған”, – тине ул. Шулай уҡ республика етәксеһе был аҙнала Башҡортостандан Даян Мурзин исемендәге дүртенсе ирекле батальондың хәрби әҙерлек үтеү өсөн юлланыуын хәбәр итте. Ул барлыҡ яуаплы кешеләргә ойоштороу эштәрен ваҡытында һәм теүәл башҡарырға ҡушты. – Был аҙнала дүртенсе, киләһе аҙнала бишенсе батальонды оҙатасаҡбыҙ. Алдан әйтеүебеҙсә, беҙ Башҡортостандың ҙур ирекле хәрби подразделениеһын булдырыу юлындабыҙ. Шуға күрә һәр кем ҙур яуаплылыҡ тойорға тейеш, – тине Радий Фәрит улы. Һаулыҡ һаҡлау министры вазифаһын башҡарыусы Азат Рәхмәтуллин коронавирусҡа бәйле һуңғы яңылыҡтар менән таныштырҙы. Уның әйтеүенсә, ҙур булмаған үҫеш күҙәтелә. Уҙған аҙнала сир 892 кешелә табылған, был алдағы ете көн менән сағыштырғанда биш процентҡа күберәк. 144 кеше дауаханала ята, 1577 кеше өйҙәрендә дауалана. Госпиталдәрҙә урындарҙың 17 проценты буш. Бынан тыш, Азат Рәхмәтуллин “Сәләмәтлек поездары” тураһында ла мәғлүмәт бирҙе. Табиптарҙың мобиль бригадалары 24-енән 28 апрелгә тиклем алты районда халыҡты ҡабул итәсәк. Был – Иглин, Бөрө, Ауырғазы, Дыуан, Бүздәк һәм Белорет райондары. Акцияла республика кардиоүҙәгенең, Ғ. Ҡыуатов исемендәге Республика клиник дауаханаһының модулдәре, күсмә ФАП-тар һәм сәләмәтлек үҙәктәре, флюорографтар, маммографтар ҡатнаша. Был аҙналағы кәңәшмәлә лә Радий Хәбиров ҡала һәм райондарҙы төҙөкләндереү темаһына иғтибар итте. Был юлы ул Өфөнөң ике районына эште көсәйтергә ҡушты. – Күп тапҡырҙар әйткәнем бар: баш ҡала таҙа һәм төҙөк булырға тейеш. Халыҡта Орджоникидзе һәм Калинин райондары буйынса һорауҙар күп. Иғтибарҙы шуларға йүнәлтегеҙ, – тине ул. Башҡортостан Башлығы, дөйөм алғанда, республикала төҙөкләндереү һәм таҙартыу акциялары барышы менән ҡәнәғәт ҡалыуын билдәләне. – Эште дауам итергә һәм барлыҡ ҡала-райондарҙа тәртип булдырырға кәрәк. Беҙ халыҡты тәртипкә өйрәтергә тейеш, бурыстарыбыҙҙы намыҫлы башҡарайыҡ, – тине ул. Торлаҡ-коммуналь хужалыҡ министры вазифаһын башҡарыусы Ирина Голованова белдереүенсә, эштәр апрель аҙағына тиклем дауам итәсәк һәм 29 апрелдә тамамлана. Кәңәшмәләге тағы бер мөһим һөйләшеү Баймаҡ ҡалаһындағы балалар поликлиникаһы төҙөлөшөнә ҡағылды. Башҡортостан Башлығы Радий Хәбиров быйыл декабрҙә ул бәләкәй пациенттар өсөн үҙ ишектәрен асырға тейеш тигән бурыс ҡуйҙы. – Төҙөлөштө ваҡытында тамамлар һәм файҙаланыуға тапшырыр өсөн мөмкин булғандың барыһын да эшләгеҙ. 1 декабрҙә балалар поликлиникаһы асылырға тейеш, – тине ул. Сменаһына 300 кешене ҡабул итерлек медицина учреждениеһын төҙөү 2021 йылда башланған ине. Эштәр “Һаулыҡ һаҡлау” милли проекты буйынса башҡарыла. – Поликлиниканы төҙөү өсөн барлығы 417,5 миллион һум аҡса бүленде, уның 354 миллион һумы – федераль бюджеттан. Дүрт ҡатлы бинаның дөйөм майҙаны 5764 квадрат метр тәшкил итә, – тине һаулыҡ һаҡлау министры вазифаһын башҡарыусы Азат Рәхмәтуллин. 26 – 28 майҙа, иртәнге 10-дан киске 10-ға тиклем Өфөләге Совет майҙанында “Китап-байрам” йәрминкәһе үтә. Был турала мәҙәниәт министры Әминә Шафиҡова һөйләне. – Әҙерлек тулы кимәлдә бара. “Китап-байрам” сайты эшләй. 90 нәшриәт унда ҡатнашырға теләк белдерҙе. Билдәле яҙыусылар менән осрашыуҙар ойоштороласаҡ, – тине министр. – Совет майҙанында ҙур китап йәрминкәһен үткәреүҙе Яҙыусылар союзы идараһы тәҡдим итте, бының өсөн уларға рәхмәт. Был китаптарҙы, китап уҡыуҙы, беҙҙең төрлө телдәрҙә ижад иткән яҙыусыларҙы һәм шағирҙарҙы популярлаштырыу, – тине Радий Хәбиров. Республика етәксеһе район хакимиәттәре башлыҡтарына мөрәжәғәт итеп, ошо сараға әүҙем уҡыусыларҙы ебәрергә тәҡдим итте. Бынан тыш, кәңәшмәлә вице-премьер Лира Иғтисамова махсус хәрби операцияла ҡатнашҡандарҙың ғаиләләренә ярҙам итеү сараларын тормошҡа ашырыу, вице-премьер Александр Шельдяев Башҡортостандың II Бөтә Рәсәй сәнәғәт туризмы буйынса акселераторҙа ҡатнашыуы тураһында һөйләне. Шулай уҡ Куйбышев тимер юлының Башҡортостан территориаль идаралығының 2022 йылдағы эш һөҙөмтәләре һәм ағымдағы йылға пландары тыңланды. Фото: Башҡортостан Хөкүмәте.