Белгес булып ҡайтһындар!

Уҙған ял көндәрендә Мәскәүҙә “Яҡташ” йәштәр мәғариф форумы үтте. Майҙансыҡ Мәскәү вуздарында белем алған Башҡортостан студенттарын һәм аспиранттарын берләштерҙе. Йәштәр менән осрашыуға Башҡортостандан абруйлы ҡунаҡтар барҙы. Тәүгеләрҙән булып форумда ҡатнашыусылар менән БР Йәштәр сәйәсәте буйынса дәүләт комитеты рәйесе Яна Гайдук осрашты. Ведомство етәксеһе йәштәрҙең һәләттәрен үҫтереү өсөн федераль һәм төбәк майҙансыҡтарын, “Рәсәй – мөмкинлектәр иле” платформаһының проекттарын күрһәтте һәм студенттарҙың һорауҙарына яуап бирҙе. - Быйыл февралдә беҙ Башҡортостан студенттары һәм аспиранттары ассоциацияһы менән килешеүгә ҡул ҡуйҙыҡ, берлектәге саралар һәм проекттар уҙғарабыҙ. Улар иҫәбендә – “Яҡташ” йәштәр мәғариф форумы, - тип мөрәжәғәт итте ҡатнашыусыларға Яна Гайдук. Беренсе көн программаһында социаль проектлау буйынса белем биреү блогы ҡаралған ине, унда студенттар йәштәр проекттары конкурстарында ҡатнашыу өсөн үҙ идеяларын әҙерләргә өйрәнде. "Яҡташ" форумының икенсе көнөндә Башҡортостандың Ғаилә, хеҙмәт һәм халыҡты социаль яҡлау министрлығы Республика халыҡ мәшғүллеге үҙәге менән берлектә студенттар өсөн вакансиялар йәрминкәһен ойошторҙо. Йәрминкәлә төбәктең 20-нән ашыу алдынғы эш биреүсеһе онлайн режимда үҙ предприятиелары менән таныштырҙы. Студенттар үҙҙәренең һөнәре буйынса республикала булған вакансиялар менән танышты, эш биреүселәр менән аралашты, үҙҙәрен ҡыҙыҡһындырған һорауҙарын бирҙе, йәйге практикаға яҙыла алды. - Был ғәҙәти булмаған йәрминкә өсөн эш биреүселәрҙе һәм вакансияларҙы студенттарҙың һорауы буйынса һайланыҡ. Яҡташтарыбыҙҙың Мәскәү университетын тамамлағандан һуң тыуған республикаһына эшкә ҡайтыуы беҙҙең өсөн бик мөһим, - тип һыҙыҡ өҫтөнә алды Башҡортостан Республикаһы ғаилә, хеҙмәт һәм халыҡты социаль яҡлау министрының беренсе урынбаҫары Юрий Мельников. Форум һуңғы көнөндә студенттар "Кесе Ватаным – Башҡортостан" тигән фекер алышыу майҙансығында ҡатнашты. Унда профессиональ йәһәттән ҙур һөҙөмтәләргә өлгәшкән республика вәкилдәре менән аралашыу, фекер алышыуҙар үтте. Мәҫәлән, Рәсәй Дәүләт Думаһы депутаты, сәйәсмән һәм йәмәғәт эшмәкәре Эльвира Айытҡолова йәштәр менән ихлас аралашты. Шулай уҡ Мәскәү һәм Санкт-Петербург вуздарында Башҡорт клубтарын үҫтереү тураһында ла йәнле һөйләшеү ойошторолдо. - Беҙҙең ассоциация Башҡортостан йәштәренә Мәскәүҙә һәм Санкт-Петербургта уҡырға ингәндә, артабан ҙур ҡала тормошона яраҡлашыуҙа һәр яҡлап ярҙам итә, тыуған республикаға белгес булып ҡайтыу перспективаларын күрһәтә. Беҙ Мәскәүҙә һәм Санкт-Петербургта ғына төрлө саралар уҙғармайбыҙ, мәҫәлән, каникул осоронда әүҙем ағзаларыбыҙ Башҡортостандың ҡала һәм райондарында уҡыусылар һәм студенттар менән осраша, үҙ белеме һәм тәжрибәһе менән уртаҡлаша, - тип һөйләне Мәскәүҙә һәм Санкт-Петербургта уҡыған Башҡортостан студенттары һәм аспиранттары ассоциацияһының башҡарма директоры Илшат Рәхмәтуллин. “Яҡташ” йәштәр мәғариф форумы Башҡортостан Республикаһының Йәштәр сәйәсәте буйынса дәүләт комитеты, Башҡортостандан Мәскәүҙә һәм Санкт-Петербургта уҡыусы студенттар һәм аспиранттар ассоциацияһы һәм Башҡортостан Республикаһының Рәсәй Федерацияһы Президенты ҡарамағындағы Тулы хоҡуҡлы вәкиллеге ҡатнашлығында ойошторолдо. Фотолар: Башҡортостан студенттары һәм аспиранттары ассоциацияһынан.