Ошо көндәрҙә экологик белем аҙналығы сиктәрендә республика Тәбиғәттән файҙаланыу һәм экология министрлығының Өфө территориаль идаралығы инспекторҙары “Таҙа Өфө” автономиялы коммерцияға ҡарамаған ойошмаһы етәксеһе Елена Воробьева менән берлектә “Экология” милли проекты маҡсаттарын һәм бурыстарын тормошҡа ашырыу маҡсатында Өфө районының Жуков ауылында “Уңыш” мәктәбенең өс класы өсөн асыҡ экодәрес үткәрҙе. Профессиональ экологтар йәмәғәтселәр менән бергә балаларға ҡаты коммуналь ҡалдыҡтар менән эш итеү һәм сүп-сарҙы айырып йыйыу өлкәһендәге реформа тураһында һөйләне. Уҡыусыларға иң ябай экологик ғәҙәттәрҙе үтәү ярҙамында тирә-яҡ мөхитте һаҡлауға нисек өлөш индерергә мөмкин булыуын аңлаттылар. Экодәрестәр барышында балалар ҡалдыҡтарҙы тарҡатыу тиҙлеге, сүп-сарҙы дөрөҫ сортҡа бүлеү, икенсел сеймалды эшкәртеү һәм ҡабаттан файҙаланыу тураһында белде. – Уҡыусылар өсөн экология дәресе – таҙа һәм экологик киләсәккә үҙенсәлекле өлөш индереү, бындай шөғөлдәр һөҙөмтәһендә аңлы ҡулланыусылар быуыны үҫеп килә һәм беҙ әле уҡыусыларға сүп-сарҙы дөрөҫ сорттарға бүлеү һәм эшкәртеү тураһында кәрәкле белем бирә һәм уларҙы тәбиғәткә һаҡсыл ҡарарға өйрәтә алабыҙ, – тине министрлыҡтың Өфө территориаль идаралығы начальнигы урынбаҫары Эльвира Ризуанова. “Таҙа Өфө” коммерцияға ҡарамаған ойошмаһы етәксеһе Елена Воробьева билдәләүенсә, балалар-йәштәр мөхитендә ҡалдыҡтарҙы айырып йыйыуҙы популярлаштырыу уҡыусыларҙа яуаплы һәм аңлы тәртип булдырыуға, шулай уҡ экологик мәҙәниәтте күтәреүгә йүнәлтелгән. Билдәләп үтәйек, “Экология” милли проекты ҡалдыҡтар менән эш итеү һөҙөмтәлелеген арттырыуға, ҙур сәнәғәт үҙәктәрендә атмосфера һауаһын бысратыу кимәлен бөтөнләй кәметеүгә, экологик мәҙәниәтте күтәреүгә, шулай уҡ Рәсәйҙең уникаль флораһын һәм фаунаһын һаҡлауға йүнәлтелгән. Ул башҡа милли проекттар кеүек үк Рәсәй Президенты Владимир Путиндың май указдары менән булдырылған. Фото: Тәбиғәттән файҙаланыу һәм экология министрлығы.