Стәрлетамаҡ ҡалаһының 1-се клиник дауаханаһы, “Һаулыҡ һаҡлау” милли проектының “Онкология сирҙәре менән көрәш” төбәк программаһына ярашлы, яңы ҡорамал алды. Электрокоагулятор аппараты операция блогында ҡулланыла. Яңы ҡорамал юғары йышлыҡлы электр тогы менән биологик туҡымаға тәьҫир итә. Уның ярҙамында яҡында ятҡан туҡымаларҙы бер юлы көйҙөрөү ысулы менән хирургик киҫемдәр яһайҙар. Был үҙ йәһәтендә ваҡ ҡан тамырҙарынан ҡан ағыуын кәметә. – Бөгөн заман хирургияһын электрокоагуляторҙарҙан башҡа күҙ алдына килтереүе ҡыйын, – ти Стәрлетамаҡ ҡалаһының 1-се клиник дауаханаһы баш табибы Андрей Палтусов. – Пациенттың һауығыуы өсөн табиптың белеме һәм оҫталығынан тыш, сифатлы медицина ҡорамалы булыуы ла шарт. Яңы ҡорамалды ҡулланыу операция оҙайлығын ҡыҫҡарта, ҡан юғалыуын кәметә. Рәсәй Президенты Владимир Путиндың “май” указдарына ярашлы, һаулыҡ һаҡлау тармағы алдында торған ошо бурыстарҙы тормошҡа ашырырға кәрәк: хеҙмәткә һәләтле йәштәге халыҡтың үлем күрһәткестәрен кәметеү, шулай уҡ яман шештәрҙән үлем күрһәткестәрен ( 100 мең кешегә 185 сир осрағына тиклем) аҙайтыу, сабыйҙар үлемен ҡыҫҡартыу (бер мең яңы тыуған сабыйға 4,5 промиллегә тиклем) һәм һәр кемдең тәүге медицина ярҙамынан файҙаланыу мөмкинлектәрен арттырыу. “Һаулыҡ һаҡлау” милли проектына ярашлы, инновациялы медицина технологияларын, шул иҫәптән, пациенттың сәләмәтлегенә иртә диагностика һәм дистанцион мониторинг системаһын индереү, тармаҡта берҙәм дәүләт мәғлүмәт системаһы нигеҙендә медицина ойошмаларының үҙ-ара берҙәм эшмәкәрлеге механизмдарын булдырыу – көн ҡаҙағындағы бурыстарҙың береһе. Фото: Һаулыҡ һаҡлау министрлығы.