"Яҡташ" форумы нисек үткән?

22 апрелдә Мәскәүҙә “Яҡташ” йәштәр мәғариф форумы старт алды. Майҙансыҡ Башҡортостандан Мәскәү вуздарында уҡыған студенттарҙы һәм аспиранттарҙы берләштерҙе. Форумда Рәсәй дәүләт нефть һәм газ университеты, И.М. Губкин исемендәге Рәсәй технология университеты, Бауман исемендәге Мәскәү дәүләт техник университеты, Серго Орджоникидзе исемендәге Рәсәй дәүләт геология-разведка университеты, Ломоносов исемендәге Мәскәү дәүләт университеты, Н.И. Пирогов исемендәге Рәсәй милли тикшеренеү медицина университеты вәкилдәре ҡатнаша. Форумда ҡатнашыусылар менән тәүгеләрҙән булып Башҡортостан Республикаһының Йәштәр сәйәсәте буйынса дәүләт комитеты рәйесе Яна Гайдук осрашты. Ведомство етәксеһе йәштәрҙең үҙ–үҙен үҫтереү өсөн федераль һәм төбәк майҙансыҡтары, “Рәсәй –мөмкинлектәр иле” платформаһының флагман проекттары менән таныштырҙы һәм студенттарҙың һорауҙарына яуап бирҙе. - Республика йәштәр сәйәсәте – ул Башҡортостанда ғына түгел, унан ситтә лә йәшәгән йәштәрҙең үҙен үҫтереү, тормошта үҙ урынын табыу өсөн шарттар булдырыу. Былар бигерәк тә тыуған илеңдән алыҫ булғанда кәрәк. Тарихи яҡтан, йәштәр һәр ваҡыт бөтә йүнәлештәрҙә лә үҫеш драйверы булып китә. Йәштәрҙең башланғыстары уңышлы тормошҡа ашырылһын, һөнәри офоҡтар киңәйһен өсөн ярҙам мөһим, һәм был йәштәр сәйәсәтенең төп бурысы. Башҡортостан - йәш һәм талантлы белгестәр тимерлеге. Февралдә беҙ Башҡортостандың Студенттар Һәм аспиранттар ассоциацияһы менән килешеү төҙөнөк һәм берлектәге саралар һәм проекттар үткәрәбеҙ. Улар иҫәбендә — “Яҡташ” йәштәр мәғариф форумы, – тип мөрәжәғәт итте ҡатнашыусыларға Яна Гайдук. Беренсе көн программаһын социаль проектлау буйынса белем биреү блогы дауам итә, унда студенттар йәштәр проекттары конкурстарында ҡатнашыу өсөн үҙ идеяларын рәсмиләштерергә өйрәнә. “Яҡташ” форумының икенсе көнөндә Башҡортостан Республикаһының Ғаилә, хеҙмәт һәм халыҡты социаль яҡлау министрлығы Республика халыҡ мәшғүллеге үҙәге менән берлектә Башҡортостанда тыуып үҫкән Мәскәү вуздары студенттары өсөн вакансиялар йәрминкәһе үткәрҙе. Йәрминкәлә төбәктең 20-нән ашыу алдынғы эш биреүселәре үҙҙәренең предприятиеларын онлайн режимында күрһәтте. Студенттар үҙ һөнәрҙәренә яраҡлы вакансиялар менән танышты, эш биреүселәр менән аралашып, уларға ҡыҙыҡһындырған һорауҙар бирҙе, йәйге практикаға яҙыла алды. – Был ғәҙәти булмаған йәрминкә өсөн барлыҡ эш биреүселәрҙе һәм вакансияларҙы студенттарҙың үҙҙәре һорауы буйынса һайланыҡ. Беҙҙең өсөн студенттарыбыҙҙың Мәскәү университеттарын тамамлағандан һуң тыуған яғына эшкә ҡайтыуы бик мөһим. Беҙгә карьера үҫеше перспективаһы менән ҙур абруйлы компанияларҙа бик күп ҡыҙыҡлы лайыҡлы вакансиялар булыуын күрһәтеү мөһим булды, - тип һыҙыҡ өҫтөнә алды Башҡортостан Республикаһы Ғаилә, хеҙмәт һәм халыҡты социаль яҡлау министрының беренсе урынбаҫары Юрий Мельников. Мәскәү һәм Санкт-Петербург вуздарында Башҡорт клубтарын үҫтереү тураһында фекер алышыу “Яҡташ” йәштәр мәғариф форумының һуңғы өлөшө булған. - Ассоциация Башҡортостан студенттарына Мәскәүҙә һәм Санкт-Петербургта уҡырға инеүҙә, яраҡлашыуҙа һәр яҡлап ярҙам итә, тыуған төйәгенә ҡайтыу мөмкинлектәрен күрһәтә. Беҙ Мәскәүҙә һәм Санкт-Петербургта төрлө саралар үткәреү менән генә сикләнмәйбеҙ. Каникулдарҙа активистарыбыҙ Башҡортостан ҡалаларында һәм райондарында уҡыусылар һәм студенттар менән осраша, унда үҙҙәренең белеме һәм тәжрибәһе менән уртаҡлаша, — тип һөйләне Мәскәүҙә һәм Санкт-Петербургта Башҡортостан Студенттары һәм аспиранттары ассоциацияһының башҡарма директоры Илшат Рәхмәтуллин. Форум 23 апрелдә тамамлана. Һуңғы көндә студенттарҙы “Башҡортостан – минең бәләкәй Ватаным” дискуссия майҙансығы һәм “Медиа-трендтар” секцияһы көтә. Сараны ойоштороусылар: Башҡортостан Республикаһының Йәштәр сәйәсәте буйынса дәүләт комитеты, Мәскәүҙә Һәм Санкт-Петербургта Башҡортостан Студенттары һәм аспиранттары ассоциацияһы һәм Рәсәй Федерацияһы президенты ҡарамағындағы Башҡортостан Республикаһының Тулы хоҡуҡлы вәкиллеге.