Кисә көндөҙ Дәүләкән районында булған авария бик аяныслы тамамлана. Унда ни бары йәш ярымлыҡ ҡына баланың ғүмере өҙөлдө. Шуныһы аяныслы, уның башына иҫерек водитель еткән. Авария райондың Поляковка – Черниговка юлының 3-сө километрында була. ВАЗ-21099 автомобиленең 18 йәшлек водителе транспортҡа идараны юғалта һәм юлдан оса. Машина электр бағанаһына бәрелә һәм түңкәрелә. Полиция хеҙмәткәрҙәре асыҡлауынса, авария ваҡытында машина эсендә биш кеше ултырған. Уларҙың өсәүһе – балалар. Һәләк булған бала артҡы ултырғыстарҙа ултырған, уның махсус балалар креслоһы булмаған. Йәнә шуныһы билдәле: водитель иҫерек булған. Шулай уҡ уның водитель таныҡлығы булмаған һәм машинаһы теркәлмәгән. Урында ЮХХДИ инспекторҙары эшләгән һәм авария сәбәптәрен асыҡлаған. Фото: ЮХХДИ.