Этләр кыргый хайваннармы?

— Соңгы елларда берәдәк хайваннар проблемасы, чыннан да, актуальләште, — диде “Вести. Интервью” программасында караучысыз хайваннар белән эшләү буенча эшче төркем җитәкчесе. — Аларның һөҗүменә зарланучылар күп, чөнки алар бик тиз үрчи, популяция һәрвакыт арта. Ә бит беркем дә аның баласының бу хайваннар корбаны булуын, беркем дә пакеттагы сосиска исен сизеп, артыннан чапкан җән­лекләр көтүеннән качарга теләми. Иҗтимагый палата утырышларында хайваннарны тоту белән шөгыльләнүче өченче кызыксынучы як — эшкуарлар да катнаша. — Без бөтен статистиканы, шул исәптән хокук саклау органнарыннан да, җентекле өйрәнәбез һәм төрле дәүләт власте органнарына проблеманы хәл итү мөмкинлеген тәкъдим итәбез, — ди Булат Әнвәр улы. — Бу юнәлештә төп эш Дәүләт җыелышы-Корылтайда алып барыла, ул “түгәрәк өстәл”ләр үткәрә һәм закон чыгару башлангычы хокукына ия. Без бары тик үз тәкъдимнәребезне генә кертәбез. Сафин әфәнде сүзләренчә, әгәр дә эткә приютта прививка ясатсаң һәм стерильләштерсәң, аның явыз булмаячагына гарантия юк. — Бүген йортсыз эт агрессив булырга мөмкин, ә иртәгә — юк, һәм киресенчә, — дип аңлата ул. — Әгәр эт ашарга тели икән, инстинктлар эшли башлаячак һәм ул һөҗүм итәчәк. Хәзер Корылтай бу проблема буенча Дәүләт думасына өч закон проектын җибәрде. Мәсәлән, торак пунктлардан читтә көтү булып йөргән этләрне караучысыз хайваннар дип түгел, ә кыргый хайваннар дип санау башлангычы. Мондый этләрдән туган икенче һәм аннан соңгы буыннар кешедән курыкмый, ә аларда хайван инстинктлары саклана. Шуңа күрә аларны санын көйләү белән шөгыльләнергә, ягъни атарга мөмкин булган категориягә кертергә тәкъдим ителә. Финанслау зур проблема булып кала. Берәдәк хайваннар хәзер бик күп, аларны тоту, сте­рильләштерү һәм аларга хуҗа табу авыр. Бу манипуляцияләргә бюджеттан бүленгән акча җитәрлек түгел. — Барысын да закон нигезендә эшләп булмый, — дип зарлана адвокат. — Федераль закон муниципаль башлыкларга хәлне контрольдә тоту бурычын куйды, ә акча юк. Шуңа күрә без проблема турында сөйләшәбез, аны хәл итү юлларын уйлыйбыз.